எலெக்ட்ரிக் காருக்கு ரூ.1.5 லட்சம் சலுகை.. செம ஜாக்பாட்!!

பெட்ரோல், டீசல் விலை பெரும் சுமையாக இருக்கும் காலத்தில் இந்தியர்கள் எலெக்ட்ரிக் வாகனங்களை நோக்கி நகர்ந்து வருகின்றனர். எலெக்ட்ரிக் வாகனங்களை ஊக்குவிக்க அரசும் பல்வேறு சலுகைகளை வழங்கி வருகிறது.

ஏற்கெனவே எலெக்ட்ரிக் வாகனங்களுக்கு இந்திய அரசு மானியம் வழங்குகிறது. இத்துடன் சேர்த்து வரிச் சலுகைகளையும் பெறலாம். அதாவது, எலெக்ட்ரிக் கார் வாங்குவதற்கு கடன் வாங்கினால் அதற்கான வட்டிக்கு 1.5 லட்சம் ரூபாய் வரை சலுகை பெறலாம்.

எலெக்ட்ரிக் கார் கடன்களுக்கான வட்டிக்கு வரிச் சலுகை வழங்கலாம் என்று 2019 பட்ஜெட்டில் கூறப்பட்டது. இதற்காக 80EEB என்ற தனிப் பிரிவும் அறிமுகப்படுத்தப்பட்டது. இந்தப் பிரிவின் கீழ், எலெக்ட்ரிக் கார் கடனுக்கான வட்டித் தொகைக்கு 1.5 லட்சம் ரூபாய் வரை சலுகை பெற முடியும்.

2500 ரூபாய்க்கு எலெக்ட்ரிக் ஸ்கூட்டர்! அட்டகாசமான ஆஃபர்!
தனிநபர்கள் மட்டுமே இச்சலுகையை பெற முடியும். தனிநபர் தேவைக்காகவும், டாக்ஸி போன்ற தொழில் தேவைக்காகவும் இச்சலுகையை பெறலாம். இந்த வட்டிச் சலுகையை ஒரு முறை மட்டுமே பயன்படுத்த முடியும். அதாவது, முதல்முறை எலெக்ட்ரிக் கார் வாங்கும்போது மட்டுமே இந்த சலுகை கிடைக்கும்.

சம்பந்தப்பட்ட வங்கி அல்லது நிதி நிறுவனத்திடம் இருந்து வட்டிச் சான்றிதழை பெற வேண்டும். வருமான வரி தாக்கல் செய்யும்போது வரி ரசீது, கடன் ஆவணங்கள், வட்டிச் சான்றிதழ் ஆகியவற்றை தயாராக வைத்துக்கொள்ள வேண்டும்.