நான் சீனாவின் ஆளா? எலான் மஸ்க் கூல் பதிலடி!

உலகின் மிகப்பெரிய பணக்காரர்களில் ஒருவரான எலான் மஸ்க், சீனாவின் கட்டுப்பாட்டில் செயல்பட்டு வருவதாக அமெரிக்க முன்னாள் அதிபர் டொனால்ட் ட்ரம்பின் முன்னாள் ஆலோசகர் ஸ்டீவ் பேனான் குற்றம்சாட்டியுள்ளார். இதற்கு எலான் மஸ்க்கும் சைலண்டாக பதில் அளித்துள்ளார்.

அமெரிக்காவில் சிலிக்கான் வேலி வங்கி கவிழ்ந்துவிட்டது. சிலிக்கான் வேலி வங்கியை எலான் மஸ்க் வாங்கி நடத்த வேண்டும் என ரேசர் (Razer) நிறுவனத்தின் தலைவர் மின் - லியங் டான் கருத்து தெரிவித்தார். அதற்கு தாமும் தயாராக இருப்பதாக எலான் மஸ்க் தெரிவித்தார்.

இதுகுறித்து பாட்காஸ்ட் நிகழ்ச்சி ஒன்றில் ஸ்டீன் பேனான் பேசியபோது எலான் மஸ்க்கை கடுமையாக தாக்கி பேசினார். அதாவது, எலான் மஸ்க் முழுக்க முழுக்க சீனாவின் கட்டுப்பாட்டில் செயல்பட்டு வருவதாகவும், சீனாவை விமர்சித்தவர்களின் ட்விட்டர் கணக்குகளுக்கு எலான் மஸ்க் இன்னும் அனுமதி அளிக்கவில்லை எனவும் அவர் தெரிவித்துள்ளார்.

மேலும், எலான் மஸ்க்கிடம் டெஸ்லா நிறுவனம் மட்டுமே மதிப்புள்ளதாக இருக்கிறது எனவும், அந்நிறுவனத்தை வைத்து எலான் மஸ்க் கடன் வாங்குவதாகவும், பங்குகளை விற்று பணம் ஈட்டுவதாகவும் ஸ்டீன் பேனான் தெரிவித்துள்ளார்.

மேலும், சீனாவில் ஷாங்காய் நகரில் அமைந்துள்ள டெஸ்லா ஆலை 100% சீன கம்யூனிஸ்ட் கட்சிக்கு சொந்தமானது எனவும், டெஸ்லா ஆலையை சீனா கட்டுப்படுத்தி வருவதாகவும் ஸ்டீவ் பேனான் கடுமையாக தாக்கி பேசியுள்ளார்.

இதற்கு எலான் மஸ்க் அளித்துள்ள பதிலில், “ஸ்டீவ் பேனான் புத்திசாலி எனவும், தீயவர் எனவும் யோசித்திருக்கிறேன். ஆனால், முதல் பகுதியான அவர் புத்திசாலி என்ற விஷயத்தில் நான் தவறாக இருந்ததை இப்போது புரிந்துகொண்டேன்” என்று தெரிவித்துள்ளார்.