ஒரே நாளில் 12 பில்லியன் டாலர் காலி.. சிக்கலில் எலான் மஸ்க்

உலகின் இரண்டாவது மிகப்பெரிய பணக்காரரான எலான் மஸ்க் ஒரே நாளில் 12 பில்லியன் டாலர் சொத்து மதிப்பை இழந்துள்ளார்.

கடந்த ஒரு வாரத்தில் எலான் மஸ்க் நடத்தி வரும் நிறுவனங்கள் தொடர்ந்து சிக்கல்களை சந்தித்து வருகின்றன. இதன் எதிரொலியாக எலான் மஸ்க்கின் சொத்து மதிப்பு ஒரே நாளில் 12 பில்லியன் டாலர் சரிந்துள்ளது. எனினும், உலகின் இரண்டாவது மிகப்பெரிய பணக்காரராக எலான் மஸ்க் தொடர்ந்து நீடித்து வருகிறார்.

எலான் மஸ்க் தற்போது டெஸ்லா, ஸ்பேஸ் எக்ஸ், ட்விட்டர் உள்ளிட்ட நிறுவனங்களை நடத்தி வருகிறார். இந்த மூன்று நிறுவனங்களுமே கடந்த ஒரு வாரத்தில் பல்வேறு சிக்கல்களை சந்தித்துள்ளன.

குறிப்பாக டெஸ்லா நிறுவனத்தின் வருமானம் கடுமையாக குறைந்துள்ளது. கடந்த ஜனவரி - மார்ச் காலாண்டில் டெஸ்லா நிறுவனத்தின் வருமானம் 24% சரிந்து 2.7 பில்லியன் டாலராக குறைந்துள்ளது. டெஸ்லா நிறுவனம் தொடர்ந்து கார் விலையை குறைத்து வருவது இதற்கு காரணமாக கூறப்படுகிறது.

டெஸ்லா பங்குகள் சரிந்ததாலேயே எலான் மஸ்க் சொத்து மதிப்பு குறைந்துள்ளது. ஏனெனில், டெஸ்லா நிறுவனத்தில் எலான் மஸ்க்கிற்கு 13% பங்கு இருக்கிறது.

இதையடுத்து ஸ்பேஸ் எக்ஸ் நிறுவனம் ஏப்ரல் 20ஆம் தேதி டெக்சஸில் உள்ள ஸ்டார்பேஸ் ஏவுதளத்தில் இருந்து சக்திவாய்ந்த ராக்கெட்டை விண்ணில் ஏவியது. எனினும், இந்த ராக்கெட் ஏவப்பட்ட சில நிமிடங்களிலேயே நடுவானில் வெடித்து சிதறியது.

இதுமட்டுமல்லாமல், ட்விட்டர் நிறுவனம் உலகம் முழுவதும் ஏராளமான பிரபலங்களுக்கு ப்ளூ டிக்கை (Blue tick) நீக்கிவிட்டது.

இப்படி ஒரே வாரத்தில் பல்வேறு சிக்கல்களால் எலான் மஸ்க் சொத்து மதிப்பு 12 பில்லியன் டாலர் சரிந்துள்ளது.