இந்தியாவில் டெஸ்லா ஆலை.. ‘நிச்சயமாக’.. எலான் மஸ்க் ஒரே போடு!

டெஸ்லா கார் ஆலை அமைப்பதற்கான போட்டியில் இந்தியாவும் இருப்பதாக எலான் மஸ்க் தெரிவித்துள்ளார்.

எலான் மஸ்க் தலைமையிலான டெஸ்லா நிறுவனம் எலக்ட்ரிக் கார்களை உற்பத்தி செய்து வருகிறது. எலக்ட்ரிக் கார் உற்பத்தியில் டெஸ்லா உலகளவில் முன்னணியில் இருக்கிறது. தற்போது அமெரிக்கா, சீனா, ஜெர்மனி ஆகிய நாடுகளில் டெஸ்லா கார் ஆலைகள் இயங்கி வருகின்றன.

இந்நிலையில், இந்தியாவிலும் டெஸ்லா நிறுவனம் கார் ஆலை அமைக்க திட்டமிட்டு வருவதாக தகவல் வெளியானது. இதை உறுதிப்படுத்தும் வகையில் கடந்த வாரம் டெஸ்லா நிறுவனத்தின் மூத்த நிர்வாகிகள் இந்தியா வந்தனர். அப்போது மத்திய அரசு அதிகாரிகளை சந்தித்து ஆலோசனை நடத்தினர்.

இதையடுத்து, டெஸ்லா நிறுவனம் இந்தியாவை உற்பத்தி மற்றும் புத்தாக்க மையமாக சீரியஸாக கருதி வருவதாக மத்திய அமைச்சர் ராஜீவ் சந்திரசேகர் தெரிவித்தார். எனவே, இந்தியாவில் டெஸ்லா நிறுவனம் எலக்ட்ரிக் கார் ஆலை அமைக்க தீவிரமாக முயற்சித்து வருவதாக எதிர்பார்ப்பு எழுந்தது.

இந்நிலையில், இந்தியா நிச்சயமாக ஆர்வமூட்டும் வகையில் இருப்பதாக எலான் மஸ்க் தெரிவித்துள்ளார். நேற்று ஒரு நிகழ்வின்போது, டெஸ்லா நிறுவனம் அடுத்த ஆலைக்கான இடத்தை இந்தாண்டு இறுதிக்குள் தேர்வு செய்யும் என எலான் மஸ்க் தெரிவித்தார்.

அப்போது எலான் மஸ்க்கிடம், இந்தியா ஆர்வமூட்டும் வகையில் இருக்கிறதா என பத்திரிகையாளர் கேட்டார். அதற்கு எலான் மஸ்க், “நிச்சயமாக” என்று தெரிவித்தார். ஆக, டெஸ்லாவின் அடுத்த ஆலைக்கான போட்டியில் இந்தியாவும் இருக்கிறது என்பது உறுதியாகியுள்ளது.

எனவே, இந்தியாவை டெஸ்லா தேர்வு செய்தாலும் எந்த மாநிலத்தில் டெஸ்லா கார் ஆலை அமையும் என இன்னொரு போட்டியும் இருக்கிறது. தமிழ்நாடு எலக்ட்ரிக் வாகன உற்பத்தி மையமாக இருப்பதால் டெஸ்லா தமிழ்நாட்டை தேர்வு செய்வதற்கான வாய்ப்பு அதிகம் இருக்கிறது எனவும் கூறப்படுகிறது.