Jobs: அனுபவமே வேணாம்.. அதிக சம்பளம், போனஸ் எல்லாம் தருவோம்.. ஊழியர்களிடம் கதறும் நிறுவனங்கள்!

ஊழியர்களுக்கு பயங்கர தட்டுப்பாடு ஏற்பட்டுள்ளதால் ஐரோப்பாவை சேர்ந்த பெரும் ஹோட்டல் நிறுவனங்கள் அனுபவமே இல்லாத ஊழியர்களை கூட வேலைக்கு எடுக்க தயாராகியுள்ளனர். இதுமட்டுமல்லாமல் புதிய ஊழியர்களை ஈர்க்க பல்வேறு சலுகைகளையும் அறிவித்துள்ளன.

ஐரோப்பிய நாடுகளில் சுற்றுலாத் துறை முக்கிய பங்கு வகிக்கிறது. மேலும் ஐரோப்பிய நாடுகள் முழுவதும் அழகிய, பிரம்மாண்டமான ஹோட்டல்கள் நிறைந்திருக்கின்றன. கொரோனா பாதிப்பு தணிந்ததால் தற்போது ஐரோப்பாவில் சுற்றுலா பயணிகள் வருகை அதிகரித்துள்ளது.

இதனால் ஹோட்டல்களில் கூட்டம் அலைமோதி டிமாண்ட் எகிறியுள்ளது. ஆனால், வாடிக்கையாளர்களுக்கு சேவை வழங்குவதற்கு போதிய ஊழியர்கள் இல்லாமல் ஹோட்டல்கள் திணறி வருகின்றன. எனவே, நிலைமையை சமாளிப்பதற்காக, அனுபவம் இல்லாத ஊழியர்களை கூட வேலைக்கு எடுக்க ஹோட்டல் நிறுவனங்கள் முடிவுக்கு வந்துவிட்டன.

Layoffs: 12,000 ஊழியர்கள் பணிநீக்கம்.. ஐடி ஊழியர்களுக்கு சிக்கல்!
ஐரோப்பிய ஹோட்டல்களில் ஊழியர்களுக்கு போதிய சம்பளம் வழங்கப்படுவதில்லை என்பது நெடுநாள் புகாராக இருந்து வந்தது. இந்நிலையில், கொரோனா ஊரடங்கு காலத்தின்போது வெளிநாடுகளில் நல்ல சம்பளம் வழங்கும் ஹோட்டல்களுக்கு ஐரோப்பிய ஹோட்டல் ஊழியர்கள் சென்றுவிட்டனர்.

இதனால் ஐரோப்பிய ஹோட்டல்களில் தற்போது ஊழியர்களுக்கு பயங்கர தட்டுப்பாடு ஏற்பட்டுள்ளது. இதை சமாளிப்பதற்காக சில ஹோட்டல்கள் அனுபவம் இல்லாத ஊழியர்களை வேலைக்கு எடுத்து அவர்களை தக்கவைக்க பல்வேறு சலுகைகளையும் வழங்குகின்றன.

ஐரோப்பாவின் மிகப்பெரிய ஹோட்டல் நிறுவனமான அக்கோர் (Accor) இப்போது முன் அனுபவம் இல்லாத ஊழியர்களை வேலைக்கு எடுத்து வருவதாக தெரிவித்துள்ளது. இவர்கள் ரெசியூம் (resume) கூட கொடுக்க தேவையில்லை. நேர்காணல் முடிந்து 24 மணி நேரத்தில் வேலை வழங்கப்படுகிறது.

பெரும்பாலும் மாணவர்கள், ஆப்பிரிக்க நாடுகளை சேர்ந்தவர்கள் நேர்காணலுக்கு வருவதாக அக்கோர் நிறுவனம் தெரிவித்துள்ளது. மேலும், ஊழியர்களை கவருவதற்காக அதிக சம்பளம், இலவச தங்குமிடம், போனஸ், சுகாதார காப்பீடு போன்ற சலுகைகளையும் ஹோட்டல் நிறுவனங்கள் வழங்கி வருகின்றன.