ஏற்றுமதியில் வளர்ச்சி... கொரோனா தொல்லை இல்லை!

இந்தியாவின் வணிக ஏற்றுமதி குறித்த விவரங்களை மத்திய வர்த்தக அமைச்சகம் வெளியிட்டுள்ளது. அதன்படி, 0.1 சதவீத வளர்ச்சியுடன் 27.2 பில்லியன் டாலர் மதிப்புக்கு 2020 டிசம்பர் மாதத்தில் ஏற்றுமதி நடைபெற்றுள்ளது. செப்டம்பர் மாதத்துக்குப் பிறகு இப்போதுதான் முதல் முறையாக ஏற்றுமதியில் வளர்ச்சி ஏற்பட்டுள்ளது. மருந்து, எலெக்ட்ரானிக் பொருட்கள், நகை மற்றும் ரத்தினங்கள் ஆகிய பிரிவுகள் வளர்ச்சி ஏற்பட்டதால் ஒட்டுமொத்த ஏற்றுமதியில் முன்னேற்றம் ஏற்பட்டுள்ளதாக அரசு தரப்பில் தெரிவிக்கப்பட்டுள்ளது.

முன்னதாக ஏற்றுமதியில் 0.8 சதவீத வளர்ச்சி இருக்கும் என்று மதிப்பீடுகள் கூறியிருந்தன. ஆனால் கொரோனா பாதிப்பைத் தொடர்ந்து மதிப்பீடுகளை விடக் குறைவான அளவிலேயே ஏற்றுமதி நடைபெற்றுள்ளது. இறக்குமதியைப் பொறுத்தவரையில், 7.6 சதவீத வளர்ச்சியுடன் மொத்தம் 42.6 பில்லியன் டாலர் மதிப்பிலான பொருட்களை இந்தியா டிசம்பர் மாதத்தில் இறக்குமதி செய்துள்ளது. 2020 பிப்ரவரி மாதத்தில்தான் ஏற்றுமதி மற்றும் இறக்குமதி ஆகிய இரண்டிலும் ஒரே மாதிரியாக வளர்ச்சி காணப்பட்டது. அதைத் தொடர்ந்து டிசம்பர் மாதத்தில்தான் இரண்டிலுமே வளர்ச்சி ஏற்பட்டுள்ளது.

LIC Insurance: பாலிசிதாரர்களுக்கு அட்டகாசமான சலுகை!

கொரோனா பாதிப்புகள் குறைந்து இயல்பு நிலை திரும்பி வருவதால் பொருளாதார நிலையிலும் ஏற்றுமதி - இறக்குமதி வர்த்தகத்திலும் இயல்புநிலை திரும்பத் தொடங்கியுள்ளது. இதன் காரணமாக, டிசம்பர் மாதத்தில் இந்தியாவின் வர்த்தகப் பற்றாக்குறை 15.4 பில்லியன் டாலராக அதிகரித்துள்ளது. அதற்கு முன்னர் 2020 ஜனவரி மாதத்தில் வர்த்தகப் பற்றாக்குறை 15.2 பில்லியன் டாலராக இருந்தது. சர்வதேச அளவில் தேவை அதிகரித்துள்ளதால் ஏற்றுமதி வர்த்தகத்தில் மேலும் முன்னேற்றம் இருக்கும் என்று சந்தை வல்லுநர்கள் கூறுகின்றனர்.