FASTag பயன்படுத்துவோர் கவனத்துக்கு... இந்த தப்பை செஞ்சிடாதீங்க!

இந்திய தேசிய நெடுஞ்சாலைகளில் உள்ள சுங்கச் சாவடிகளில் வாகனங்கள் வரிசையில் காத்துக் கிடப்பது பிரச்சினையாக இருந்து வந்தது. சுங்கக் கட்டணம் செலுத்துவதில் தாமதம், சில்லறை வழங்குவதில் சிக்கல் உள்ளிட்ட பல்வேறு பிரச்சினைகளால் வாகனங்கள் நீண்ட வரிசையில் மணிக் கணக்கில் காத்துக்கிடக்க வேண்டியிருந்தது. இப்பிரச்சினைக்குத் தீர்வுகாணும் வகையில் ஃபாஸ்டாக் கட்டண முறை அமலுக்கு வந்தது. இதன் மூலம் சுங்கக் கட்டணத்தை டிஜிட்டல் முறையில் செலுத்தலாம் என்பதால் சுங்கச் சாவடிகளில் நெரிசல் குறைந்துள்ளது.

பிப்ரவரி 15ஆம் தேதி முதல் ஃபாஸ்டாக் கட்டண முறை அமலுக்கு வந்துள்ளது. ஆனால் இன்னமும் பல வாகனங்கள் ஃபாஸ்டாக் முறைக்கு மாறாமல் உள்ளன. அப்படி ஃபாஸ்டாக் முறைக்கு மாறியிருந்தாலும் அந்த அக்கவுண்டில் ரீசார்ஸ் செய்யாமல் இருப்பது, செயல்படாத ஃபாஸ்டாக் போன்ற பிரச்சினைகளும் இருக்கின்றன. ஃபாஸ்டாக் பயன்படுத்துபவர்கள் முக்கியமான 5 விஷயங்களைக் கவனத்தில் வைத்திருக்க வேண்டும். அவற்றை மீறும் பட்சத்தில் சுங்கச் சாவடிகளில் இரு மடங்கு கட்டணம் செலுத்த நேரிடலாம்.

வட்டி விகிதம் குறைக்கப்படுமா? ரிசர்வ் வங்கி என்ன செய்யப்போகிறது?
உங்களிடம் ஃபாஸ்டாக் இல்லாமல் வாகனத்தை சுங்கச்சாவடியின் ஃபாஸ்டாக் பாதையில் ஓட்டிச் சென்றால், நீங்கள் டோல் தொகையை விட இரண்டு மடங்கு கூடுதலாகக் கட்டணம் செலுத்த வேண்டும்.

குறைந்த பேலன்ஸ் காரணமாக உங்களது ஃபாஸ்டாக் வேலை செய்யவில்லையென்றாலோ அல்லது ஃபாஸ்டாக் சேதமடைந்துவிட்டாலோ நீங்கள் ஃபாஸ்டாக் லயனில் செல்லக் கூடாது. அப்படிச் சென்றால் இரு மடங்கு கட்டணம் செலுத்த நேரிடும்.

உங்களது வாகனத்துக்கு மூன்றாம் தரப்பு காப்பீடு எடுத்திருந்தால் அதற்கும் ஃபாஸ்டாக் தேவைப்படும். இதற்கு முன்பு அப்படிப்பட்ட விதிமுறை இல்லை. புதிய விதிமுறைப்படி, உங்களது காருக்கு காப்பீடு எடுக்கும்போது ஃபாஸ்டாக்கிலும் கவனம் செலுத்த வேண்டும்.

எந்தவொரு வாகன உரிமையாளரும் ஒரே ஃபாஸ்டாக்கை வெவ்வேறு வாகனங்களுக்கு பயன்படுத்தக் கூடாது. ஒரு ஃபாஸ்டாக் ஒரு வாகனத்துக்கு மட்டுமே. உங்களிடம் ஒன்றுக்கு மேற்பட்ட வாகனங்கள் இருந்தால், ஒவ்வொரு வாகனத்திற்கும் தனித்தனியாக ஃபாஸ்டேக் பொருத்த வேண்டும்.

நீங்கள் ஒரு குறிப்பிட்ட சுங்கச்சாவடி வழியாக தொடர்ந்து அல்லது அடிக்கடி பயணம் செய்தால் மாதாந்திர பாஸ் பெற்று பயணம் செய்வது சிறந்தது.