சமூக பாதுகாப்பு ஓய்வூதியம்.. நிதியமைச்சர் பிடிஆர் வெளியிட்ட குட் நியூஸ்!

தமிழ்நாடு சட்டமன்றத்தில் இன்று 2023-24ஆம் நிதியாண்டுக்கான மாநில பட்ஜெட் அறிக்கையை நிதியமைச்சர் பிடிஆர் பழனிவேல் தியாகராஜன் தாக்கல் செய்தார்.

இந்த பட்ஜெட்டில் மகளிருக்கு 1000 ரூபாய் உரிமைத் தொகை, நிலம் மற்றும் வீடுகளுக்கு பதிவுக் கட்டணம் குறைப்பு, மதுரை மெட்ரோ ரயில் திட்டம், கோவை மெட்ரோ ரயில் திட்டம் உள்பட பல்வேறு அறிவிப்புகளை நிதியமைச்சர் பிடிஆர் பழனிவேல் தியாகராஜன் வெளியிட்டுள்ளார்.

இதுபோக, சமூக பாதுகாப்பு ஓய்வூதியம் தொடர்பான அறிவிப்பையும் நிதியமைச்சர் பழனிவேல் தியாகராஜன் வெளியிட்டுள்ளார். அதன்படி, இரு லட்சம் பேருக்கு சமூகப் பாதுகாப்பு ஓய்வூதியம் வழங்கப்படும் எனவும், புதிதாக இணைக்கப்படுவோரால் சமூகப் பாதுகாப்பு ஓய்வூதியம் பெறும் பயனாளிகள் எண்ணிக்கை 35.8 லட்சமாக உயரும் எனவும் அவர் தெரிவித்துள்ளார்.

இதுகுறித்து நிதியமைச்சர் பிடிஆர் பழனிவேல் தியாகராஜன் தனது பட்ஜெட் உரையில், “விளிம்புநிலையில் உள்ள மக்களுக்கும், நலிவுற்ற பிரிவினருக்கும் தக்க சமூகப் பாதுகாப்பை உறுதிசெய்ய, பல்வேறு நடவடிக்கைகளை இந்த அரசு மேற்கொண்டு வருகிறது.
இந்த அரசு பொறுப்பேற்ற பின்னர், மே, 2021 முதல் புதிதாக
5,76,725 பேர்களுக்கு முதியோர் ஓய்வூதியம் உள்ளிட்ட பல்வேறு சமூகப் பாதுகாப்பு ஓய்வூதியங்கள் வழங்கப்பட்டுள்ளன.

இவை தவிர, பெறப்பட்ட விண்ணப்பங்களில் தகுதியான ஒரு லட்சம் பேர்களுக்கு சமூகப் பாதுகாப்பு ஓய்வூதியம் வழங்கப்படும். இதன் மூலம், சமூகப் பாதுகாப்பு ஓய்வூதியம் பெறும் பயனாளிகளின் மொத்த எண்ணிக்கை 35.8 இலட்சமாக உயரும். சமூகப் பாதுகாப்பு ஓய்வூதியங்களுக்காக இம்மதிப்பீடுகளில் 5,346 கோடி ரூபாய் ஒதுக்கீடு செய்யப்பட்டுள்ளது” என்று தெரிவித்துள்ளார்.