தக்க சமயத்தில் வந்த உதவி: தமிழகத்துக்கு எத்தனை கோடி?

நாடு முழுவதும் கொரோனா பாதிப்பு மிகவும் தீவிரமடைந்துள்ளது. கொரோனா பாதிப்பால் இதுவரையில் 603 பேர் பேர் உயிரிழந்துள்ளதோடு, 18985 பேருக்கு கொரோனா உறுதிசெய்யப்பட்டுள்ளது. கொரோனா பரவலைத் தடுக்க மத்திய அரசும் மாநில அரசுகளும் கடுமையாகப் போராடி வருகின்றன. கொரோனாவுக்கு எதிரான போராட்டத்தில் பல்வேறு தொழில் நிறுவனங்களும், அரசு அமைப்புகளும், பொதுமக்களும் நிதியுதவி அளித்து வருகின்றனர். சிகிச்சைக்காகவும், பாதுகாப்பு அம்சங்களுக்காகவும் அதிகம் செலவிடப்பட்டு வருகிறது. பொருளாதார மந்தநிலை இருக்கும் இச்சூழலில் கொரோனா பாதிப்பு மேலும் நெருக்கடியை ஏற்படுத்தியுள்ளது.

ஒவ்வொரு மாநிலமும் கொரோனாவை எதிர்க்கும் போராட்டத்தில் அதிகம் செலவிட்டு வரும் நிலையில், அதற்கு ஆதரவு அளிக்கும் வகையில் மாநில அரசுகளுக்கான வரிப் பகிர்வை மத்திய அரசு விடுவித்துள்ளது. ஏப்ரல் மாதத்துக்கான வரிப் பகிர்வில், மாநிலங்களுக்கு ரூ.46,038 கோடியை மத்திய அரசு வழங்கியுள்ளது. இதுகுறித்து மத்திய நிதியமைச்சகம் தனது ட்விட்டர் பக்கத்தில் வெளியிட்டுள்ள செய்தியில், கொரோனா பாதிப்பு இருக்கும் இச்சமயத்தில் மாநில அரசுகளுக்கு இந்தி நிதியை வழங்க ஒப்புதல் வழங்கப்பட்டுள்ளதாகவும், இது பெரிதும் உதவியாக இருக்கும் எனவும் தெரிவிக்கப்பட்டுள்ளது.

வேலையைப் பறிக்கும் கொரோனா: ஆஸி. மட்டும் விதிவிலக்கா?

2020-21 நிதியாண்டின் பட்ஜெட் மதிப்பீட்டில் மாநிலங்களுக்கான வரிப் பகிர்வு ரூ.7.84 லட்சம் கோடியாக இருக்கும் என்று மதிப்பிடப்பட்டுள்ளது. 14ஆவது நிதிக் குழுவின் பரிந்துரைப் படி மத்திய அரசின் வரி வருவாயில் 42 சதவீதத்தை மாநிலங்களுக்கு வழங்கப் பரிந்துரைக்கப்பட்டது. 15ஆவது நிதிக் குழுவின் பரிந்துரையில் மாநிலங்களுக்கு 41 சதவீதமும், ஜம்மு காஷ்மீர், லடாக் யூனியன் பிரதேசங்களுக்கு ஒரு சதவீதம் வழங்கப்பட வேண்டும் என்று தெரிவிக்கப்பட்டுள்ளது. தற்போது மத்திய அரசு வழங்கியுள்ள வரிப் பகிர்வில், தமிழகத்துக்கு ரூ.1,928.56 கோடி வழங்கப்படுகிறது. ஆந்திராவுக்கு ரூ.1,892.64 கோடியும், தெலங்கானாவுக்கு ரூ.982 கோடியும், கர்நாடகாவுக்கு ரூ.1,678.57 கோடியும், கேரளாவுக்கு ரூ.894.53 கோடியும் வழங்கப்பட்டுள்ளது.