70 பேரைக் கோடீஸ்வரர் ஆக்கிய ஃபிளிப்கார்ட்!

இந்திய ஆன்லைன் மின்னணு வர்த்தகச் சந்தையில் ஃபிளிப்கார்ட் நிறுவனம் நீண்ட காலமாகவே ஆதிக்கம் செலுத்தி வருகிறது. அதுவும் குறிப்பாக, ஒவ்வொரு ஆண்டும் பண்டிகை சீசனின் போது பல்வேறு சிறப்புச் சலுகைகளை அறிவித்து வாடிக்கையாளர்கள் அதிகமாக ஈர்த்து வருவாய் ஈட்டுவது வழக்கம். இக்காலத்தில் ஃபிளிப்கார்ட் நிறுவனம் மட்டுமல்லாமல், ஃபிளிப்கார்ட் தளத்தின் மூலமாகத் தங்களது பொருட்களை விற்பனை செய்யும் நிறுவனங்களும் லாபத்தை அள்ளுவது அள்ளும். அந்த வகையில் இந்த ஆண்டுக்கான பண்டிகைக்கால சிறப்பு விற்பனை தொடங்கிவிட்டது. அக்டோபர் 16ஆம் தேதியில் ஃபிளிப்கார்ட் நிறுவனம் தனது ’பிக் பில்லியன் டே’ சிறப்பு விற்பனையைத் தொடங்கியது.

விற்பனை தொடங்கி மூன்றே நாட்களில் 70க்கும் மேற்பட்ட விற்பனையாளர்கள் கோடிக் கணக்கில் வருவாய் ஈட்டியுள்ளதாகத் தெரியவந்துள்ளது. மேலும், 10,000 பேர் லட்சக்கணக்கில் லாபம் ஈட்டியுள்ளனர். ஃபிளிப்கார்ட் தளத்தில் விற்பனை செய்த 3 லட்சத்துக்கும் மேற்பட்ட விற்பனையாளர்களில் சுமார் 60 சதவீதத்தினர் இரண்டாம் அடுக்கு மற்றும் கிராமப்புறங்களில் அதிகளவில் பொருட்களை விற்பனை செய்துள்ளது தெரியவந்துள்ளது. இந்த ஆண்டில் பெரு நகரங்களில் மட்டுமல்லாமல் சிறு நகரங்களிலும், கிராமங்களிலும் கூட விற்பனை சூடுபிடித்துள்ளதாக ஃபிளிப்கார்ட் நிறுவனம் கூறுகிறது.

பிஎஃப் பயனாளிகள் கவனத்துக்கு... இதைச் செய்யாவிட்டால் ஆபத்து!

கிட்டத்தட்ட 3,000 பின் கோடுகளுக்கு ஃபிளிப்கார்ட் நிறுவனத்தின் விற்பனை இந்த ஆண்டில் விரிவடைந்துள்ளது. 2019ஆம் ஆண்டின் சிறப்பு விற்பனையின்போது முதல் ஆறு நாட்களில் நடைபெற்ற விற்பனையை விட இந்த மூன்று நாட்களில் விற்பனை அதிகமாக இருந்துள்ளது. வீட்டு உபயோகப் பொருட்கள், தனிநபர் சுகாதாரப் பாதுகாப்புப் பொருட்கள் இந்த ஆண்டில் அதிகளவில் விற்பனை செய்யப்பட்டு வருகின்றன. அதேபோல, ஃபிளிப்கார்ட் மூலம் பொருட்கள் வாங்குபவர்கள் பெரும்பாலும் டிஜிட்டல் முறையிலேயே அதற்கான பணத்தைச் செலுத்துகின்றனர். ரொக்கப் பணப்புழக்கம் கணிசமாகக் குறைந்துள்ளது. கொரோனா பாதிப்புகளையும் தாண்டி இந்த ஆண்டில் விற்பனை அதிகரித்திருப்பது வரவேற்பைப் பெற்றுள்ளது.