நிதிப் பற்றாக்குறையில் தத்தளிக்கும் இந்தியா!

இந்திய அரசு ஈட்டும் வருவாய் மற்றும் மேற்கொள்ளும் செலவு ஆகிய இரண்டுக்கும் உள்ள இடைவெளிதான் நிதிப் பற்றாக்குறை. 2019-20 நிதியாண்டில் இந்தியாவின் நிதிப் பற்றாக்குறையை 3.3 சதவீதத்திலேயே வைத்திருக்க மத்திய அரசு இலக்கு நிர்ணயித்திருந்தது. ஆனால், செலவுகள் அதிகரித்து வருவாய் குறைந்து வந்த நிலையில், நிதிப் பற்றாக்குறை இலக்கு 3.8 சதவீதமாக உயர்த்தப்படுவதாக நிதியமைச்சர் நிர்மலா சீதாராமன் அறிவித்திருந்தார். ஆனால், எதிர்பார்த்தபடி அரசின் வருவாய் அதிகரிக்காத நிலையில் சென்ற ஆண்டில் இந்திய அரசுக்கு நிதிப் பற்றாக்குறை ஏற்பட்டுள்ளது.

2019-20 நிதியாண்டுக்கான இந்தியாவின் மொத்த உள்நாட்டு உற்பத்தி குறித்த விவரங்களை மத்திய புள்ளியியல் மற்றும் திட்ட அமலாக்க அமைச்சகம் நேற்று வெளியிட்டது. அதில், ஜனவரி - மார்ச் காலாண்டில் இந்தியாவின் மொத்த உள்நாட்டு உற்பத்தி வளர்ச்சி 3.1 சதவீதமாகவும், 2019-20 முழு நிதியாண்டுக்கான வளர்ச்சி 4.2 சதவீதமாகவும் இருக்கும் என்று மதிப்பிடப்பட்டுள்ளது. அதோடு இந்திய அரசின் நிதிப் பற்றாக்குறையானது 4.6 சதவீதமாக உயர்ந்துள்ளதாகத் தெரிவிக்கப்பட்டுள்ளது. இது முன்பே கணித்திருந்த 3.8 சதவீதத்தை விட 0.8 சதவீதம் அதிகமாகு.

பொருளாதார வளர்ச்சி: இந்தியாவின் நிலை?

கொரோனா ஊரடங்கு பிரச்சினையால் அரசின் வரி வருவாயில் பாதிப்பு ஏற்பட்டுள்ளது. மாறாக, செலவுகள்தான் அதிகரித்துள்ளன. 2019-20 நிதியாண்டில் இந்திய அரசுக்கு ரூ.19.31 லட்சம் கோடி வருவாய் வரும் என்று மதிப்பிடப்பட்டிருந்த நிலையில், ரூ.17.5 லட்சம் கோடி மட்டுமே கிடைத்துள்ளது. அரசின் செலவுகளைப் பொறுத்தவரையில், 2019-20 நிதியாண்டில் அரசின் செலவுகள் ரூ.26.86 லட்சம் கோடியாக இருக்கும் என்று மதிப்பிடப்பட்டிருந்த நிலையில், அது ரூ.26.98 லட்சம் கோடியாக உயர்ந்துள்ளது. இவ்வாறாக சென்ற ஆண்டில் இந்திய அரசின் நிதிப் பற்றாக்குறை அதிகரித்துள்ளது. நடப்பு நிதியாண்டில் கொரோனா பாதிப்பால் நிதிப் பற்றாக்குறை இன்னும் அதிகரிக்கும் என்று அஞ்சப்படுகிறது.

தங்கம் விலை: இன்னைக்கு வாங்கலாமா, வேண்டாமா?

வருவாய் பற்றாக்குறையைப் பொறுத்தவரையில், 2019-20 நிதியாண்டில் இந்தியாவின் மொத்த உள்நாட்டு உற்பத்தியில் வருவாய் பற்றாக்குறை 3.27 சதவீதமாக இருந்துள்ளது. ஆனால் முந்தைய மதிப்பீடுகளில் இதன் அளவு 2.4 சதவீதமாக இருக்கும் என்று கணிக்கப்பட்டிருந்தது.