நிதிப் பற்றாக்குறையில் இந்திய மாநிலங்கள்!

இந்தியாவின் மொத்த உள்நாட்டு உற்பத்தியில் நிதிப் பற்றாக்குறையின் நிலை குறித்து இந்தியா ரேட்டிங்ஸ் நிறுவனம் ஆய்வறிக்கை வெளியிட்டுள்ளது. அதன்படி, இந்த 2021-22 நிதியாண்டில் இந்திய மாநிலங்களின் நிதிப் பற்றாக்குறை 4.3 சதவீதமாக இருக்கும் என்று மதிப்பிடப்பட்டுள்ளது. முன்னதாக 2020-21 நிதியாண்டில் நிதிப் பற்றாக்குறை 4.6 சதவீதமாக இருந்தது. இந்தியா ரேட்டிங்ஸ் நிறுவனம் இதற்கு முன்னர் வெளியிட்டிருந்த அறிக்கையில் இந்தியாவின் நிதிப் பற்றாக்குறை நிலையாக இருக்கும் என்று கூறியிருந்தது. இந்நிலையில், தற்போதைய மதிப்பீட்டில் நிதிப் பற்றாக்குறை எதிர்மறையாக இருக்கும் என்று கூறியுள்ளது.

2020-21 நிதியாண்டுக்கான நிதிப் பற்றாக்குறையும் 4.5 சதவீதமாக இருக்கும் என்று முதலில் மதிப்பிடப்பட்டது. பின்னர் அது 4.6 சதவீதமாக உயர்த்தப்பட்டது. மொத்த உள்நாட்டு உற்பத்தியைப் பொறுத்தவரையில், 2021-22 நிதியாண்டில் நாமினல் ஜிடிபி 14.5 சதவீதமாக இருக்கும் என்று மதிப்பிடப்பட்டுள்ளது. நடப்பு நிதியாண்டில் மாநிலங்களின் வருவாய் 0.6 சதவீதம் குறையும் எனவும், 2021-22 நிதியாண்டில் அது 8.4 சதவீதம் உயரும் எனவும் இந்தியா ரேட்டிங்ஸ் நிறுவனம் தனது ஆய்வில் நம்பிக்கை தெரிவித்துள்ளது.

சிலிண்டர் மானியம் பெற இது கட்டாயம்... இணைப்பது ஈசி!

நடப்பு நிதியாண்டின் தொடக்கத்தில் கொரோனா ஊரடங்கால் அரசின் வருவாய் குறைந்து செலவுகள் அதிகரித்ததால் நிதிப் பற்றாக்குறை அதிகமானது. பொருளாதார வளர்ச்சியைப் பொறுத்தவரையில், 2021-22 நிதியாண்டில் இந்தியப் பொருளாதாரம் 11 சதவீதம் வளர்ச்சியடையும் என்று பொருளாதார ஆய்வறிக்கையில் மதிப்பிடப்பட்டுள்ளது. மேலும், நடப்பு 2020-21 நிதியாண்டில் இந்தியப் பொருளாதாரம்7.7 சதவீதம் வீழ்ச்சியைச் சந்திக்கும் எனவும் தெரிவிக்கப்பட்டுள்ளது. இந்த நிதியாண்டில் இந்தியப் பொருளாதாரம் 7.5 சதவீதம் வீழ்ச்சியடையும் என்று ரிசர்வ் வங்கியும், 7.7 சதவீதம் வீழ்ச்சியடையும் என்று தேசியப் புள்ளியியல் அலுவலகமும் தெரிவித்திருந்தன.