அடிமேல் அடி வாங்கும் இந்தியப் பொருளாதாரம்!

2019ஆம் ஆண்டு தொடங்கியதிலிருந்தே இந்தியப் பொருளாதார வளர்ச்சி பின்னோக்கிச் சென்றுகொண்டிருக்கிறது. ஏப்ரல் - ஜூன் காலாண்டில் 5 சதவீதமாகவும், ஜூலை - செப்டம்பர் காலாண்டில் 4.5 சதவீதமாகவும் நாட்டின் பொருளாதார வளர்ச்சி வீழ்ச்சியடைந்துள்ளது. இந்த ஆண்டின் எஞ்சிய காலாண்டுகளிலும் வளர்ச்சி மந்தமாகவே இருக்கும் என்று சர்வதேச ஆய்வு நிறுவனங்கள் கணித்துள்ளன. எனினும், 2020ஆம் ஆண்டு நிறைவுக்குப் பிறகு வளர்ச்சி மேம்பட வாய்ப்பிருப்பதாகவும் கூறப்பட்டுள்ளது.

ஏற்கெனவே வேலையின்மை தொடர்பான விமர்சனங்கள் அதிகமாக இருக்கும் நிலையில், பொருளாதார வளர்ச்சி நிலை குறித்த குற்றச்சாட்டுகள் மோடி அரசின் மீது தொடர்ந்து சுமத்தப்பட்டு வருகின்றன. பொருளாதார மந்தநிலையை ஒப்புக்கொண்டுள்ள மத்திய அரசு அதை மீட்டெடுப்பதற்கான நடவடிக்கையில் தீவிரமாக ஈடுபட்டுள்ளதாகத் தெரிவித்துள்ளது. இதுபோன்ற சூழலில் மத்திய அரசுக்கு மேலும் ஒரு எச்சரிக்கையாக, ஃபிட்ச் ரேட்டிங்ஸ் நிறுவனம் தனது மதிப்பீட்டைக் குறைத்துள்ளது.

கிராமங்கள் இல்லாமல் நாடு வளரவே வளராது!

முன்னதாக ஃபிட்ச் நிறுவனம் வெளியிட்டிருந்த ஆய்வறிக்கையில் 2019-20 நிதியாண்டில் இந்தியா 5.6 சதவீத வளர்ச்சியைக் கொண்டிருக்கும் என்று தெரிவித்திருந்த நிலையில், தற்போதைய அறிக்கையில், வெறும் 4.6 சதவீத வளர்ச்சி மட்டுமே இருக்கும் என்று எச்சரித்துள்ளது. நுகர்வோரிடைய நம்பகத்தன்மை குறைவு, கடனுதவிகள் போதிய அளவில் கிடைக்கப்பெறாதது, வங்கிகளின் நிதி நெருக்கடிகள் போன்றவற்றை ஃபிட்ச் நிறுவனம் காரணமாகக் கூறியுள்ளது. மேலும், இந்தியாவின் கடன் மதிப்பீட்டு அளவையும் ஃபிட்ச் நிறுவனம் அபாயகர நிலையில் இருப்பதாக வகைப்படுத்தியுள்ளது.

"நாங்கதான் பொருளாதாரத்தை மீட்டெடுத்தோம்": மோடி சொல்வது உண்மையா?

வருகிற 2020-21 நிதியாண்டில் வளர்ச்சி சற்று மேம்பட்டு 6.5 சதவீதமாக இருக்கும் என ஃபிட்ச் நிறுவனம் தனது ஆய்வில் நம்பிக்கை தெரிவித்துள்ளது. நாட்டின் மொத்த உள்நாட்டு உற்பத்தியில் அரசின் கடன் அளவு 70.4 சதவீதமாகவும், நிதிப் பற்றாக்குறை 7.5 சதவீதமாக இருக்கும் எனவும் ஃபிட்ச் மதிப்பிட்டுள்ளது.