TCS முன்னாள் CEO ராஜேஷ் கோபிநாதன் சம்பளம் இத்தனை கோடியா!

டிசிஎஸ் நிறுவனத்தின் முன்னாள் CEO ராஜேஷ் கோபிநாதனின் சம்பளம் 29.16 கோடி ரூபாயாக உயர்ந்துள்ளது.

இந்தியாவின் மிகப்பெரிய ஐடி நிறுவனமான டிசிஎஸ் நிறுவனத்தின் CEO ஆக ராஜேஷ் கோபிநாதன் பதவி வகித்து வந்தார். அவர் அண்மையில் ராஜினாமா செய்வதாக அறிவித்ததை தொடர்ந்து டிசிஎஸ் நிறுவனத்தின் புதிய CEO ஆக கிருதிவாசன் தேர்வு செய்யப்பட்டார்.

ஜூன் 1ஆம் தேதி முதல் டிசிஎஸ் CEO ஆக கிருதிவாசன் பதவியேற்றுள்ளார். இந்நிலையில், 2022-23ஆம் நிதியாண்டில் ராஜேஷ் கோபிநாதனுக்கு மொத்தம் 29.16 கோடி ரூபாய் சம்பளம் வழங்கப்பட்டுள்ளதாக டிசிஎஸ் நிறுவனம் வெளியிட்டுள்ள ஆண்டறிக்கை வாயிலாக தெரியவந்துள்ளது.

இதன்படி, ராஜேஷ் கோபிநாதனின் மொத்த சம்பளம் கடந்த நிதியாண்டில் 13.17 சதவீதம் அதிகரித்துள்ளது. அதற்கு முந்தைய நிதியாண்டில் ராஜேஷ் கோபிநாதனுக்கு 25.75 கோடி ரூபாய் சம்பளம் வழங்கப்பட்டது குறிப்பிடத்தக்கது.

ராஜேஷ் கோபிநாதனுக்கு வழங்கப்பட்ட மொத்த சம்பளத்தில் அடிப்படை சம்பளம், கமிஷன், படி மற்றும் இதர பலன்கள் அடங்கும். 2022-23ஆம் நிதியாண்டில் ராஜேஷ் கோபிநாதன் கமிஷனாக மட்டும் 25 கோடி ரூபாய் பெற்றுள்ளார்.

ராஜேஷ் கோபிநாதனிடம் சுமார் 2,760 டிசிஎஸ் பங்குகள் இருக்கின்றன. இவற்றின் தற்போதைய சந்தை மதிப்பு 90.37 லட்சம் ரூபாய்.

ராஜேஷ் கோபிநாதன் 2017ஆம் நிதியாண்டு முதல் டிசிஎஸ் CEO பதவியில் இருந்து வந்தார். இந்த பதவிக்காலத்தில் அவரது சம்பளம் 4.6 மடங்கு உயர்ந்துள்ளது.

2017ஆம் நிதியாண்டில் அவரது சம்பளம் 6.21 கோடி ரூபாயாக இருந்தது. 2018ஆம் ஆண்டில் 12.48 கோடி ரூபாயாகவும், 2019ஆம் ஆண்டில் 16.02 கோடி ரூபாயாகவும், 2020ஆம் ஆண்டில் 13.37 கோடி ரூபாயாகவும், 2021ஆம் ஆண்டில் 20.36 கோடி ரூபாயாகவும், 2022ஆம் ஆண்டில் 25.75 கோடி ரூபாயாகவும், 2023ஆம் ஆண்டில் 29.16 கோடி ரூபாயாகவும் உயர்ந்துள்ளது.