OPEC Supply Cut: மோடிக்கு ஆரம்பமே அசத்தல்; மளமளவென குறையப் போகும் எரிபொருள் விலை!

சர்வதேச சந்தையில் கச்சா எண்ணெய் விலை 9 டாலர் அளவிற்கு வீழ்ச்சி கண்டுள்ளது. இதன் எதிரொலியாக இந்தியாவில் எரிபொருள் விலை பெருமளவு குறையும் என்று எதிர்பார்க்கப்படுகிறது. மோடி தலைமையிலான தேசிய ஜனநாயகக் கூட்டணி அரசு பதவியேற்று, சில நாட்கள் மட்டுமே ஆகியுள்ளது.

இந்த சூழலில் எரிபொருள் விலை குறைவு, இந்தியப் பொருளாதாரத்திற்கு மிகவும் சாதகமானதாக பார்க்கப்படுகிறது. கடந்த வியாழன் அன்று, கச்சா எண்ணெய் விலை ஒரு பேரல் விலை 70 டாலராக இருந்தது. இந்நிலையில் நேற்று ஒரு பேரல் கச்சா எண்ணெய் விலை 61 டாலராக குறைந்தது.

சீனா மற்றும் மெக்சிகோ இடையில் கடுமையான வர்த்தகப் போக்கை அமெரிக்கா கடைபிடித்து வருகிறது. இதனால் சர்வதேச சந்தையில் மந்தமான சூழல் நிலவுகிறது. இதன் எதிரொலியாக மே 29ஆம் தேதியில் இருந்து, பெட்ரோல் மற்றும் டீசல் விலை முறையே 56 பைசா மற்றும் 93 பைசா அளவிற்கு இந்தியன் ஆயில் நிறுவனம் குறைத்துள்ளது.

சர்வதேச சந்தையில் எண்ணெய் விலை சரிவு தொடர்ந்து நீடித்தால், இந்தியச் சந்தையில் எரிபொருள் விலை பெருமளவு குறையும் என்று கூறப்படுகிறது.

இந்திய எண்ணெய் நிறுவனங்களைப் பொறுத்தவரை, சர்வதேச எரிபொருள் விலை மற்றும் ரூபாய் மதிப்பில் ஏற்படும் மாறுபாடு ஆகியவற்றின் சராசரியைக் கொண்டு, தினசரி பெட்ரோல், டீசல் விலையை நிர்ணயிக்கின்றன. இத்தகைய முறையானது, சர்வதேச சந்தையில் ஏற்படும் உயர்வு உடனடியாக இந்திய சந்தையில் எதிரொலிப்பதை தவிர்க்கிறது.

முன்னதாக கச்சா எண்ணெய் விலை சரிவின் காரணமாக, எண்ணெய் வளமிக்க நாடுகளின் வருவாய் கடுமையாக பாதிக்கப்பட்டது. இதனால் கச்சா எண்ணெய் விலையை உயர்த்த உற்பத்தி குறைக்கப்படும் என்ற முடிவை ஒபெக் எனப்படும் பெட்ரோலிய பொருட்கள் ஏற்றுமதி நாடுகளின் கூட்டமைப்பு எடுத்தது. இந்த சூழலிலும் கச்சா எண்ணெய் விலை குறைந்திருப்பது குறிப்பிடத்தக்கது.