டாக்குமெண்ட் இல்லாமல் நகைக் கடன்... ரூ.50 லட்சம் வரை வாங்கலாம்!

நிதி நெருக்கடியைச் சமாளிக்கவும், தொழில் தொடங்கவும், மற்ற தேவைகளுக்காகவும் பலர் தங்களது நகையை வைத்து வங்கிகளில் கடன் வாங்குவார்கள். எந்த வங்கியில் கடன் வாங்கலாம்; எவ்வளவு வட்டி செலுத்த வேண்டும்; செயல்பாட்டுக் கட்டணம் எவ்வளவு; ஏதேனும் சலுகை உள்ளதா போன்ற விவரங்களைத் தெரிந்துகொள்ளாமலேயே பணம் கிடைத்தால் போதும் என்ற நிலையில் நகையை வைத்துக் கடன் வாங்கிவிடுவார்கள். பின்னர்தான் யோசிப்பார்கள், இந்த வங்கியில் வாங்கியிருக்கலாம்; இந்தத் திட்டத்தின் கீழ் வாங்கியிருக்கலாம் என்று.

பெரிய அளவில் நகைக் கடன் வாங்குவோருக்கு நல்ல செய்தியாக, இந்தியாவின் மிகப் பெரிய பொதுத் துறை வங்கியான ஸ்டேட் பேங்க் ஆஃப் இந்தியா, சிறப்புக் கடன் திட்டத்தை அறிவித்துள்ளது. SBI SME Gold Loan என்ற திட்டத்தின் கீழ் வாடிக்கையாளர்கள் ரூ.1 லட்சம் முதல் ரூ.50 லட்சம் வரையில் குறைந்த வட்டியில் கடன் வாங்கலாம். சிறு குறு நடுத்தர நிறுவனங்கள் துறையை மையப்படுத்தி இக்கடன் வழங்கப்படுகிறது. எந்த நிறுவனத்துக்காக கடன் வாங்கி விரும்புகிறார்களோ அந்த நிறுவனம் இயங்கிக் கொண்டிருக்க வேண்டும்; வாராக் கடன் பிரச்சினையில் சிக்கியிருக்கக் கூடாது.

பென்சன், சம்பள உயர்வு, பிஎஃப்... முக்கிய அறிவிப்பு!
இந்தக் கடனை வாங்குவதற்கு நிதி சார்ந்த ஆவணங்கள் எதுவும் தேவையில்லை என்று ஸ்டேட் பேங்க் ஆஃப் இந்தியா அறிவித்துள்ளது. நிறுவனத்தின் விற்று முதல் தொடர்பான விவரத்தை மட்டும் தெரிவித்தால் போதும். இந்த நகைக் கடன் Overdraft அல்லது Demand Loan பிரிவின் கீழ் வழங்கப்படும். ரூ.10 லட்சம் வரையிலான கடன்களுக்கு செயல்பாட்டுக் கட்டணம் ரூ.500 என்று நிர்ணயம் செய்யப்பட்டுள்ளது. ரூ.10 லட்சத்துக்கு மேலான கடன்களுக்கு வரியுடன் ரூ.1,000 செயல்பாட்டுக் கட்டணம் வசூலிக்கப்படும்.