தொடர்ந்து 5 மாதங்களாக வீழ்ச்சி... தங்கத்துக்கு மவுசு குறைவு!

இந்தியாவில் தொடர்ந்து ஐந்தாவது மாதமாக ஏப்ரலில் தங்கம் இறக்குமதி வீழ்ச்சியடைந்துள்ளது. இதன்படி, ஏப்ரல் மாதத்தில் தங்கம் இறக்குமதி 100 விழுக்காடு சரிந்து 2.83 மில்லியன் டாலராக குறைந்துள்ளது. உலகளவில் பல நாடுகளில் கொரோனா பாதிப்பை தடுக்க ஊரடங்கு அமல்படுத்தப்பட்டுள்ளதால் தங்கம் இறக்குமதி குறைந்துள்ளதாக வர்த்தகர்கள் கூறுகின்றனர்.

2019ஆம் ஆண்டு ஏப்ரல் மாதத்தில் 3.97 பில்லியன் டாலருக்கு தங்கம் இறக்குமதி செய்யப்பட்டுள்ளதாக மத்திய வர்த்தக அமைச்சகத்தின் தகவல்கள் மூலம் தெரியவருகிறது. எனினும், தங்கம் இறக்குமதி சரிந்தது இந்தியாவின் வர்த்தகப் பற்றாக்குறையை கடந்த மாதத்தில் 6.8 பில்லியன் டாலராக குறைக்க பெரிதும் உதவியுள்ளது. கடந்த ஆண்டிலோ வர்த்தகப் பற்றாக்குறை ரூ.15.33 பில்லியன் டாலராக இருந்துள்ளது.

கடந்த ஆண்டு டிசம்பர் மாதம் முதல் தொடர்ந்து தங்கம் இறக்குமதி சரிந்துகொண்டே வருகிறது. உலகளவில் தங்கம் இறக்குமதியில் இந்தியா முதலிடத்தில் இருக்கிறது. இந்தியாவில் இறக்குமதி செய்யப்படும் தங்கத்தில் பெரும்பகுதி நகை உற்பத்தி தொழில்துறைக்கே பயன்படுத்தப்படுகிறது.

ஒவ்வொரு ஆண்டும் இந்தியா சுமார் 800 டன் முதல் 900 டன் தங்கத்தை இறக்குமதி செய்கிறது. ஏப்ரல் மாதத்தில் நகைகள் மற்றும் ரத்தினக் கற்களின் இறக்குமதியும் 98.74 விழுக்காடு சரிந்து 36 மில்லியன் டாலராக குறைந்துள்ளது.

2018-19ஆம் ஆண்டில் ஒட்டுமொத்த தங்கம் இறக்குமதி 32.91 பில்லியன் டாலராக இருந்துள்ளது. ஆனால், 2019-20ஆம் ஆண்டில் ஒட்டுமொத்த தங்கம் இறக்குமதி 14.23 விழுக்காடு சரிந்து 28.2 பில்லியன் டாலராக குறைந்துள்ளது.