தங்கம் இறக்குமதி மீண்டும் சரிவு!

சர்வதேச அளவில் தங்கம் நுகர்வில் இரண்டாவது மிகப் பெரிய நாடாக உள்ள இந்தியா கிட்டத்தட்ட 700 டன் தங்கத்தை ஒவ்வொரு ஆண்டும் இறக்குமதி செய்கிறது. இந்தியாவில் நகை உற்பத்திக்காகவே பெரும்பாலான தங்கம் பயன்படுத்தப்படுகிறது. மார்ச் மாதத் தொடக்கத்தில் இந்தியாவில் கொரோனா பாதிப்புகள் அதிகரிக்கத் தொடங்கியவுடன் ஆடம்பரப் பொருட்களுக்கான செலவுகளை இந்தியர்கள் குறைக்கத் தொடங்கினர். குறிப்பாக தங்கம் மீதான முதலீடுகளும், தங்கம் விற்பனையும் குறைந்துபோனது. இதனால் தங்கம் இறக்குமதியிலும் வீழ்ச்சி ஏற்பட்டது.

அதைத் தொடர்ந்து ஒவ்வொரு மாதமும் தங்கம் இறக்குமதி தொடர்ந்து குறைந்து வருகிறது. ஏப்ரல் மாதத்தில் இந்தியா மொத்தம் 50 கிலோ தங்கத்தை மட்டுமே இறக்குமதி செய்திருந்தது. இது 99.9 சதவீத வீழ்ச்சியாகும். அதோடு, கடந்த 30 ஆண்டுகளில் இது மோசமான வீழ்ச்சியாகும். மதிப்பு அடிப்படையில், 2.84 மில்லியன் டாலர் மதிப்பிலான தங்கத்தை இந்தியா ஏப்ரல் மாதத்தில் இறக்குமதி செய்திருந்தது. மே மாதத்திலும் தங்கம் இறக்குமதி 99 சதவீதம் வீழ்ச்சியடைந்தது. வெறும் 1.4 டன் தங்கத்தை மட்டுமே இந்தியா இறக்குமதி செய்தது. ஜூன் மாதத்தைப் பொறுத்தவரையில், இந்தியாவின் தங்கம் இறக்குமதி 86 சதவீதம் வீழ்ச்சியடைந்தது. ஜூன் மாதத்தில் மொத்தம் 11 டன் அளவு தங்கத்தை மட்டுமே இறக்குமதி செய்தது.

தங்கம் விலை: பாடாய் படுத்தும் தங்கம்... தீர்வு எப்போது?

இந்நிலையில், ஜூலை மாதத்துக்கான இறக்குமதி விவரங்களை மத்திய அரசு வெளியிட்டுள்ளது. அதன்படி, 24 சதவீத சரிவுடன் 30 டன் தங்கத்தை இந்தியா ஜூலை மாதத்தில் இறக்குமதி செய்துள்ளது. 2019ஆம் ஆண்டின் ஜூலை மாதத்தில் இந்தியா 39.66 டன் தங்கத்தை இறக்குமதி செய்திருந்தது. மதிப்பு அடிப்படையில், தங்கம் இறக்குமதி 1.71 பில்லியன் டாலரிலிருந்து 1.78 பில்லியன் டாலராக உயர்ந்துள்ளது. நகை விற்பனையைப் பொறுத்தவரையில், ஜனவரி மாதத் தொடக்கம் முதலே தங்கத்தின் விலை தொடர்ந்து உயர்த்தப்பட்டு வருகிறது. சென்னையில் ஆபரணத் தங்கத்தின் விலை கிராமுக்கு 5,000 ரூபாயையும் தாண்டிச் செல்கிறது. தங்கம் விலையேற்றத்தால் அதன் தேவை குறைந்து விற்பனையும் மந்தமாகியுள்ளது.