இந்தியாவின் தங்கம் இறக்குமதி சரிவு.. காரணம் என்ன?

கடந்த 2022-23ஆம் நிதியாண்டில் இந்தியாவின் தங்கம் இறக்குமதி 24.15 சதவீதம் சரிந்து 35 பில்லியன் டாலராக குறைந்துள்ளது என மத்திய அரசு தகவல் வெளியிட்டுள்ளது.

இந்தியாவின் நடப்பு கணக்கு பற்றாக்குறையில் தங்கம் இறக்குமதிக்கு பெரும் பங்கு உண்டு. அண்மையில் சர்வதேச அளவில் பொருளாதார நிச்சயத்தன்மை இல்லாத சூழல் உருவாகியுள்ளது. இந்நிலையில், இந்தியாவின் தங்கம் இறக்குமதி 24.15% சரிந்துள்ள்ளது.

முந்தைய 2021-22ஆம் நிதி ஆண்டில் இந்தியாவின் தங்கம் இறக்குமதி 46.2 பில்லியன் டாலராக இருந்தது. கடந்த ஆண்டு ஆகஸ்ட் மாதம் முதல் கடந்த பிப்ரவரி மாதம் வரை இந்தியாவின் தங்கம் இறக்குமதி சரிந்துகொண்டே வந்துள்ளது.

எனினும், மார்ச் மாதத்தில் மட்டும் தங்கம் இறக்குமதி 3.3 பில்லியன் டாலராக உயர்ந்துள்ளது. இதற்கு உலகளவில் நிலவும் பொருளாதார அச்சம், வங்கி துறை நெருக்கடி போன்றவை காரணமாக இருக்கலாம்.

இந்தியாவின் தங்கம் இறக்குமதி சரிந்துள்ள நிலையில் வெள்ளி இறக்குமதியோ 6.12% அதிகரித்து 5.29 பில்லியன் டாலராக உயர்ந்துள்ளது.

இந்தியாவின் நடப்பு கணக்கு பற்றாக்குறையில் தங்கம் இறக்குமதிக்கு பெரும் பங்கு இருக்கிறது. ஆனால், தங்கம் இறக்குமதி குறைந்த பிறகும் இந்தியாவின் நடப்பு கணக்கு பற்றாக்குறை குறையவில்லை. இதற்கு இறக்குமதியை விட ஏற்றுமதி அதிகமாக இருப்பதால் ஏற்படும் வர்த்தக பற்றாக்குறையே முக்கிய காரணமாக உள்ளது.

இந்தியாவின் தங்கம் இறக்குமதி குறைந்ததற்கு தங்கத்துக்கு இந்திய அரசு விதித்துள்ள மிக அதிக இறக்குமதி வரிதான் காரணம். இதுபோக சர்வதேச பொருளாதார சூழலும் தங்கம் இறக்குமதி குறைந்ததற்கு மற்றொரு காரணமாக உள்ளது.

உலகளவில் தங்கம் இறக்குமதியில் இந்தியா முதலிடத்தில் இருக்கிறது. ஏனெனில், இந்திய மக்கள் அதிகளவில் தங்கம் வாங்குகின்றனர். இந்தியா இறக்குமதி செய்யும் தங்கத்தில் பெரும்பகுதி தங்க நகைகள் தயாரிப்பதற்கே பயன்படுத்தப்படுகின்றன.