தங்கம் விலை வரலாறு காணாத உச்சம்.. இனி எப்போதான் நகை வாங்க முடியும்?

இந்தியாவில் இன்று தங்கம் விலை வரலாறு காணாத உச்சத்தை தொட்டுள்ளது. இன்று MCX சந்தையில் தங்கம் விலை 60455 ரூபாய் என்ற வரலாறு காணாத புதிய உயரத்தை தொட்டுள்ளது.

கடந்த ஒரு வார காலமாகவே தங்கம் விலை உயர்ந்துகொண்டே வருகிறது. விரைவில் இந்தியாவில் 10 கிராம் தங்கம் விலை 60000 ரூபாயை தொட்டுவிடும் என எதிர்பார்க்கப்பட்டு வந்தது. இந்நிலையில், இன்று தங்கம் விலை 60000 ரூபாயை தாண்டியுள்ளது.

10 கிராம் தங்க விலை 60,000 ரூபாயை தாண்டியது மட்டுமல்லாமல் அதற்கு மேலும் உயர்ந்து 60455 ரூபாய் என்ற புதிய உச்சத்தை தொட்டுவிட்டது. வரும் நாட்களிலும் தங்கம் விலை மேலும் உயரும் என்றுதான் எதிர்பார்ப்பு எழுந்துள்ளது. வரும் நாட்களில் தங்கம் விலை எப்படி இருக்கும் என்பதை பற்றி பார்க்கலாம்.

தங்கம் விலை ஏன் உயருகிறது?

சர்வதேச அளவில் வங்கித் துறையில் ஏற்பட்டுள்ள நெருக்கடியே தங்கம் விலை உயருவதற்கு முக்கிய காரணமாக உள்ளது. மார்ச் 10ஆம் தேதி அமெரிக்காவில் சிலிக்கான் வேலி வங்கி திவாலானது. இதன்பின் நியூ யார்க்கை சேர்ந்த சிக்னேச்சர் வங்கியும் திவாலானது.

கிரெடிட் சூயிஸ் வங்கி விற்பனை

இதையடுத்து சுவிட்சர்லாந்து நாட்டை சேர்ந்த கிரெடிட் சூயிஸ் வங்கியும் கடும் நெருக்கடிக்குள்ளாகியுள்ளது. இதைத்தொடர்ந்து, சுவிட்சர்லாந்தை சேர்ந்த யூபிஎஸ் வங்கி கிரெடிட் சூயிஸ் வங்கியை 3.23 பில்லியன் டாலருக்கு வாங்க நேற்று ஒப்புக்கொண்டுள்ளது.

தங்கம் விலை உயர்வு

வங்கி துறையில் சர்வதேச அளவில் ஏற்பட்டுள்ள இந்த நெருக்கடியே தங்கம் விலை உயரக் காரணம். ஏனெனில், தங்கம் ஒரு பாதுகாப்பான சொத்தாகவும், நாணயமாகவும் கருதப்படுகிறது. எனவே மக்களும், முதலீட்டாளர்களும் தங்கள் பணத்தை தங்கத்தில் குவித்து வருகின்றனர். இதனால் தங்கம் விலை தாறுமாறாக உயர்ந்து புதிய உச்சத்தை தொட்டுள்ளது.

அடுத்து தங்கம் விலை குறையுமா?

மார்ச் 22ஆம் தேதி அமெரிக்க பெடரல் ரிசர்வ் வங்கி தனது அறிவிப்புகளை வெளியிட இருக்கிறது. அதற்கேற்ப தங்கத்தின் அடுத்த நகர்வு இருக்கும் என எதிர்பார்க்கப்படுகிறது.

வங்கி துறையில் ஏற்பட்டுள்ள நெருக்கடிக்கு மத்தியில் அமெரிக்க பெடரல் ரிசர்வ் வங்கி வட்டி விகிதத்தை உயர்த்துமா என்பது சந்தேகமாகவே உள்ளது. எனினும், வட்டி விகிதத்தை உயர்த்தினால் தங்கம் விலை குறைய வாய்ப்புள்ளது. வட்டி விகிதத்தை குறைக்காமல் அப்படியே விட்டுவிட்டால் தங்கம் விலை மேலும் உயரலாம் என எதிர்பார்க்கப்படுகிறது.