சக்கை போடு போடும் எலெக்ட்ரிக் ஸ்கூட்டர்... 10 ஆயிரம் வாகனங்கள் விற்பனை!

இந்தியாவில் இப்போது பெட்ரோல் - டீசல் விலை உயர்வு என்பது பெரும் பிரச்சினையாக இருந்து வருகிறது. தங்கத்தின் விலையை விட பெட்ரோல் விலைதான் அளவுக்கு அதிகமாக உயர்த்தப்படுகிறது. இதனால் பொதுமக்கள் பெரும் சிரமத்தை எதிர்கொண்டுள்ளனர். வாங்கும் சம்பளத்தில் பெட்ரோல், டீசலுக்கே பெரிய தொகை செலவிட வேண்டியதாக உள்ளது. இதனால் நிறையப் பேர் எலெக்ட்ரிக் வாகனங்களுக்கு மாறத் தொடங்கிவிட்டனர். இது சுற்றுச் சூழலுக்கு மாசுபாடின்மை, குறைந்த விலை, லுக், ஸ்மார்ட் அம்சங்கள் போன்றவை வாடிக்கையாளக்ரளை வெகுவாக ஈர்த்துள்ளன.

வாடிக்கையாளர்களை அதிகமாகக் கவருவதற்காக ஆட்டோமொபைல் நிறுவனங்களும் புதிது புதிதாக எலெக்ட்ரிக் வாகனங்களை அறிமுகப்படுத்தி வருகின்றன. விற்பனையும் தொடர்ந்து அதிகரித்து வருகிறது. கிரீவ்ஸ் எலெக்ட்ரிக் மொபிலிட்டி நிறுவனம் சென்ற டிசம்பர் மாதத்தில் மட்டும் 10,000க்கும் மேற்பட்ட எலெக்ட்ரிக் ஸ்கூட்டர்களை விற்பனை செய்துள்ளதாகத் தெரிவித்துள்ளது. இதுமட்டுமல்லாமல், எலெக்ட்ரிக் மூன்று சக்கர வாகன விற்பனையில் 101 சதவீத வளர்ச்சி ஏற்பட்டுள்ளது.

ஓலா எலெக்ட்ரிக் ஸ்கூட்டர்: நாடு முழுவதும் டெலிவரி!
அக்டோபர் - டிசம்பர் காலாண்டில் கிரீவ்ஸ் எலெக்ட்ரிக் நிறுவனம் எலெக்ட்ரிக் மூன்று சக்கர வாகனச் சந்தையில் சிறந்த தொழில் வளர்ச்சியைப் பதிவுசெய்துள்ளது. ELE நிறுவனத்தின் 100 சதவீத பங்குகளையும், MLR ஆட்டோ நிறுவனத்தின் 25 சதவீதப் பங்குகளையும் கைப்பற்றி எலெக்ட்ரிக் மூன்று சக்கர வாகனச் சந்தையில் கிரீவ்ஸ் எலெக்ட்ரிக் நிறுவனம் ஆதிக்கம் செலுத்துகிறது.

கிரீவ்ஸ் எலெக்ட்ரிக் நிறுவனம் மட்டுமல்லாமல், மற்ற எலெக்ட்ரிக் வாகன நிறுவனங்களும் விற்பனையில் குறிப்பிடத்தகுந்த வளர்ச்சியை எட்டியுள்ளன. சமீபத்தில்தான் ஓலா நிறுவனம் எலெக்ட்ரிக் ஸ்கூட்டர் விற்பனையைத் தொடங்கியது. முன்பதிவு செய்தவர்களுக்கான டெலிவரி டிசம்பர் 15ஆம் தேதியில் ஆரம்பமானது. ஓலாவின் எஸ்1, எஸ்1 புரோ மாடல் ஸ்கூட்டர்கள் வாடிக்கையாளர்களிடையே அதிக வரவேற்பைப் பெற்றுள்ளன.