ஜிஎஸ்டி மசோதா மக்களவையில் அறிமுகம் செய்யப்படுகிறது!

வரும் திங்கள்கிழமையன்று திருத்தங்களுடன் கூடிய ஜிஎஸ்டி மசோதாவை மக்களவையில் நிதியமைச்சர் அருண் ஜேட்லி தாக்கல் செய்ய உள்ளார்.

பெரும் போராட்டத்திற்குப் பின்னர், மாநிலங்களவையில் ஜிஎஸ்டி மசோதாவை தாக்கல் செய்த நிதியமைச்சர் அருண் ஜேட்லி, அதில் சில திருத்தங்களையும் தற்போது மேற்கொண்டுள்ளார். இதையடுத்து, திங்கள்கிழமை மக்களவையில், திருத்தம் செய்யப்பட்ட ஜிஎஸ்டி மசோதாவை தாக்கல் செய்கிறார்.

மக்களவையில் பாஜக.,வுக்கு தனிப் பெரும்பான்மை உள்ளதால், மசோதா திட்டமிட்டபடி ஒரேநாளில் நிறைவேறிவிடும் என்று, எதிர்பார்க்கப்படுகிறது. 2017ம் ஆண்டு ஏப்ரல் 1ம் தேதிக்குள் ஜிஎஸ்டி மசோதாவை நாடு முழுவதும் அமல்படுத்த இலக்கு நிர்ணயிக்கப்பட்டுள்ளது. எனவே, இதுதொடர்பான, சட்டப்பூர்வ பணிகள் அனைத்தையும் முழுமூச்சில் முடிக்க, அருண் ஜேட்லி தீர்மானித்துள்ளதாக, அரசு வட்டாரங்கள் தெரிவிக்கின்றன.

மக்களவையில் ஜிஎஸ்டி மசோதா நிறைவேறிய அடுத்த 60 நாட்களுக்குள், இதுதொடர்பான செயற்குழு ஒன்று ஏற்படுத்தப்பட உள்ளது. அதில், மத்திய, மாநில அரசுகளைச் சேர்ந்த பிரதிநிதிகள் பங்கேற்பார்கள் என்றும், அவர்களின் ஆலோசனையின் பேரில், படிப்படியாக, மாநில அரசுகளுடன் விவாதித்து, ஜிஎஸ்டி மசோதா அமலுக்கு வரும் என்றும் கூறப்பட்டுள்ளது. அதேசமயம், ஜம்மு காஷ்மீர் மாநிலத்திற்காக, ஜிஎஸ்டி.,யில் சில திருத்தங்கள் செய்யப்பட உள்ளது குறிப்பிடத்தக்கது.