GST : பிப்ரவரி மாதம் ரூ.1.49 லட்சம் கோடி ஜிஎஸ்டி வசூல்.. தமிழ்நாட்டின் வருவாய் எவ்வளவு தெரியுமா?

கடந்த பிப்ரவரி மாதத்தில் 1.49 லட்சம் கோடி ரூபாய்க்கு மேல் ஜிஎஸ்டி வருவாய் வசூலாகியுள்ளதாக மத்திய அரசு தகவல் வெளியிட்டுள்ளது.

இதுகுறித்து நிதியமைச்சகம் வெளியிட்டுள்ள செய்தியில், பிப்ரவரி மாதத்தில் 1,49,577 கோடி ரூபாய் ஜிஎஸ்டி வருவாய் வசூலாகியுள்ளதாக தெரிவித்துள்ளது. கடந்த ஆண்டு பிப்ரவரியை காட்டிலும் இது 12% உயர்வு எனவும் நிதியமைச்சகம் தெரிவித்துள்ளது.

2023 பிப்ரவரி ஜிஎஸ்டி வசூல்

பிப்ரவரி மாதத்தில் 1,49,577 கோடி ரூபாய் ஜிஎஸ்டி வசூலாகியுள்ளது. அதில் மத்திய ஜிஎஸ்டி 27,662 கோடி ரூபாயும், மாநில ஜிஎஸ்டி 34,915 கோடி ரூபாயும் ஒருங்கிணைந்த ஜிஎஸ்டியாக 75,069 கோடி ரூபாயும் வசூலாகியுள்ளது. இந்த ஒருங்கிணைந்த ஜிஎஸ்டியில் இறக்குமதி பொருட்கள் வாயிலாக 35,689 கோடி ரூபாய் வசூலாகியுள்ளது.

செஸ் வரி வசூல்

செஸ் வரியாக 11,931 கோடி ரூபாய் வசூலாகியுள்ளது. இதில் இறக்குமதி பொருட்கள் வாயிலாக 792 கோடி ரூபாய் வசூலாகியுள்ளது. ஒருங்கிணைந்த ஜிஎஸ்டி 75,069 கோடி ரூபாயில் இருந்து மத்திய ஜிஎஸ்டிக்கு 34,770 கோடி ரூபாயும், மாநில ஜிஎஸ்டிக்கு 29,054 கோடி ரூபாயும் செலுத்தப்பட்டுள்ளது.

ஜிஎஸ்டி வருவாய்

மொத்தமாக ஜிஎஸ்டி வாயிலாக பிப்ரவரி மாதத்தில் மத்திய அரசு 62,432 கோடி ரூபாயும், மாநில அரசுகள் 63,969 கோடி ரூபாயும் வருவாய் ஈட்டியுள்ளன. 2022ஆம் ஆண்டு பிப்ரவரி மாத ஜிஎஸ்டி வருவாய் வசூலை காட்டிலும் 2023ஆம் ஆண்டு பிப்ரவரி மாத ஜிஎஸ்டி வருவாய் வசூல் 12% அதிகரித்துள்ளது.

அதேபோல, பிப்ரவரி மாதத்தில் இறக்குமதி பொருட்கள் வாயிலான வருவாய் 6% உயர்ந்துள்ளது. மேலும், உள்நாட்டு பரிவர்த்தனைகள் வாயிலான வருவாய் 15% அதிகரித்துள்ளது. இதுமட்டுமல்லாமல், ஜிஎஸ்டி அமல்படுத்தப்பட்ட பின் பிப்ரவரி மாதம் முதல்முறையாக 11,931 கோடி ரூபாய் செஸ் வரி வசூலாகியுள்ளது.

வழக்கமாக பிப்ரவரி மாதம் 28 நாட்கள் மட்டுமே என்பதால் மற்ற மாதங்களை விட ஜிஎஸ்டி வசூல் குறைவாகவே இருக்கும். இருப்பினும், முன்னெப்போதும் இல்லாத அளவுக்கு செஸ் வரி வசூலாகியுள்ளது.

தமிழ்நாட்டின் ஜிஎஸ்டி வருவாய்

2023 பிப்ரவரி மாதத்தில் தமிழ்நாட்டின் ஜிஎஸ்டி வருவாய் 8,774 கோடி ரூபாய். 2022 பிப்ரவரி மாதத்தில் தமிழ்நாட்டின் ஜிஎஸ்டி வருவாய் 7,393 கோடி ரூபாய். 2022 பிப்ரவரியை காட்டிலும் 2023ஆம் ஆண்டு பிப்ரவரியில் தமிழ்நாட்டின் ஜிஎஸ்டி வருவாய் 19% அதிகரித்துள்ளது.

புதுச்சேரியின் ஜிஎஸ்டி பங்கு

2023 பிப்ரவரியில் புதுச்சேரியின் ஜிஎஸ்டி வருவாய் 188 கோடி ரூபாய். 2022 பிப்ரவரியில் புதுச்சேரியின் ஜிஎஸ்டி வருவாய் 178 கோடி ரூபாயாக இருந்தது. 2022 பிப்ரவரியை காட்டிலும் 2023 பிப்ரவரியில் புதுச்சேரியின் ஜிஎஸ்டி வருவாய் 5% உயர்ந்துள்ளது.