பென்சன் தொகை உயர்வு.. ஓய்வூதியதாரர்களுக்கு செம குட் நியூஸ்!

பென்சன் தொகை மூலமாக மக்கள் தங்களுடைய ஓய்வுக் காலத்தில் ஒரு நிலையான தொகையைப் பெறுகிறார்கள். ஓய்வு பெற்றவர்கள் ஓய்வூதியத்தின் மூலம் நிறைய நன்மைகளைப் பெறுகிறார்கள். அவர்களின் செலவுகளைச் சமாளிப்பது எளிதாகிறது. இந்நிலையில், தற்போது ஹரியானா மாநில அரசு ஓய்வூதியம் தொடர்பாக ஒரு முக்கிய அறிவிப்பை வெளியிட்டுள்ளது. இதன் காரணமாக அம்மாநில மக்கள் பெறும் ஓய்வூதியத்தின் அளவு அதிகரிக்கப் போகிறது. ஹரியானா பட்ஜெட்டை தாக்கல் செய்யும் போது, ஹரியானா முதல்வர் மனோகர் லால் கட்டார் ஓய்வூதியம் தொடர்பான அறிவிப்புகளை வெளியிட்டார்.

ஹரியானா முதல்வர் மனோகர் லால் கட்டார் 2023-24 நிதியாண்டுக்கான மாநில பட்ஜெட்டை விதான்சபாவில் பிப்ரவரி 23ஆம் தேதி தாக்கல் செய்தார். அப்போது முதல்வர் மனோகர் லால் கட்டார் கூறுகையில், மாநில மக்கள் மீது புதிய வரி விதிக்கப்படாது என்றார். மாநிலத்தின் நிதியமைச்சகப் பொறுப்பையும் கட்டார் வகிக்கும் நிலையில், வரும் நிதியாண்டுக்கான ரூ.1,83,950 கோடி மதிப்பிலான மாநில பட்ஜெட்டை தாக்கல் செய்துள்ளார்.

பிஜேபி மற்றும் ஜேஜேபி அரசாங்கத்தின் இரண்டாவது ஆட்சியின் நான்காவது பட்ஜெட் இதுவாகும். இந்த பட்ஜெட்டை தாக்கல் செய்த முதல்வர் கட்டார், பட்ஜெட்டில் புதிய வரி விதிக்கும் திட்டம் எதுவும் இல்லை என சட்டசபையில் தெரிவித்தார். இதனுடன், ஓய்வூதியத் திட்டம் தொடர்பான முக்கிய அறிவிப்பையும் முதல்வர் கட்டார் வெளியிட்டார். அதன் பலன் நிறையப் பேருக்குக் கிடைக்கப் போகிறது.

சமூகப் பாதுகாப்பு ஓய்வூதியத்தை தற்போதுள்ள 2500 ரூபாயிலிருந்து 2750 ரூபாயாக உயர்த்தப்பட்டுள்ளது. இதனுடன், ஹரியானா பசு பாதுகாப்பு சேவை ஆணையத்திற்கான நிதியை தற்போதுள்ள ரூ.40 கோடியிலிருந்து ரூ. 400 கோடியாக உயர்த்தி அறிவித்துள்ளார். 2023-24 நிதியாண்டில் குறைந்தபட்சம் 65,000 வழக்கமான பணியிடங்களை நிரப்புவதாகவும் முதல்வர் அறிவித்தார்.