கடன் வாங்குவோருக்கு நற்செய்தி... வட்டியைக் குறைத்த ஹெச்டிஎஃப்சி!

இந்தியாவின் மிகப் பெரிய தனியார் துறை வங்கியான ஹெச்டிஎஃப்சி தனது எம்சிஎல்ஆர் (marginal cost based lending rate) கட்டணத்தைக் குறைப்பதாக இன்று அறிவித்துள்ளது. இதன்படி, அனைத்து கால வரம்புகளுக்கான கடன்களின் வட்டி விகிதமும் 10 அடிப்படைப் புள்ளிகள் குறைக்கப்படுகிறது. இதையடுத்து ஹெச்டிஎஃப்சி வங்கியில் வீட்டுக் கடன், வாகனக் கடன் உள்ளிட்ட கடன் வாங்கியவர்களுக்கு ஈஎம்ஐ தொகை குறையும் என்பதால் வாடிக்கையாளர்கள் மகிழ்ச்சியடைந்துள்ளனர்.

இதுகுறித்து ஹெச்டிஎஃப்சி வெளியிட்டுள்ள அறிக்கையில், ஓவர்நைட் எம்சிஎல்ஆர் கட்டணம் 7 சதவீதமாகவும், ஒரு மாத கால வரம்புக்கான கடன்களுக்கு 7.05 சதவீதமாகவும், மூன்று மாத கால வரம்புக்கான கடன்களுக்கு ரூ.7.10 சதவீதமாகவும், ஆறு மாத கால வரம்புக்கான கடன்களுக்கு 7.20 சதவீதமாகவும், ஒரு வருட கால வரம்புக்கான கடன்களுக்கு 7.35 சதவீதமாகவும், இரண்டு வருட கால வரம்புக்கான கடன்களுக்கு 7.45 சதவீதமாகவும் நிர்ணயிக்கப்பட்டுள்ளது. இந்த வட்டிக் குறைப்பானது இன்று (ஆகஸ்ட் 7) முதல் அமலுக்கு வந்துள்ளது.

கடனாளிகளுக்கு ஆறுதல் தருமா ரிசர்வ் வங்கியின் அறிவிப்பு?

ஹெச்டிஎஃப்சி மட்டுமல்லாமல் மற்ற முன்னணி வங்கிகளும் வட்டிக் குறைப்பை அறிவித்துள்ளன. இந்தியாவின் இரண்டாவது மிகப் பெரிய தனியார் துறை வங்கியான ஐசிஐசிஐ வங்கியும் ஆகஸ்ட் 1 முதல் அதன் கடன் விகிதங்களை 10 அடிப்படை புள்ளிகள் குறைப்பதாக அறிவித்தது. பொதுத் துறை வங்கியான கனரா வங்கியும் அதன் எம்சிஎல்ஆர் கட்டணத்தை 30 அடிப்படைப் புள்ளிகள் வரை குறைப்பதாக அறிவித்தது. திருத்தப்பட்ட புதிய கடன் விகிதங்கள் ஆகஸ்ட் 7 முதல் அமலுக்கு வரும் என்று கனரா வங்கி தெரிவித்துள்ளது.

வட்டியில் எந்த மாற்றமும் இல்லை: ரிசர்வ் வங்கி அறிவிப்பு!

ரிசர்வ் வங்கியின் நாணயக் கொள்கைக் கூட்டத்தில் ரெப்போ விகிதக் குறைப்பு மீதான எதிர்பார்ப்பில் வங்கிகள் தங்களது வட்டி விகிதங்களைக் குறைத்தன. இருப்பினும் பணவீக்கப் பிரச்சினையைக் கருத்தில் கொண்டு இந்த முறை ரெப்போ வட்டி விகிதத்தை ரிசர்வ் வங்கி குறைக்கவில்லை. 4 சதவீதமாகவே நீடிக்கும் என்று அறிவித்தது. இந்த ஆண்டில் மட்டும் ரெப்போ வட்டி விகிதத்தை 115 புள்ளிகள் குறைத்துள்ளது என்பது குறிப்பிடத்தக்கது.