எச்டிஎஃப்சி வங்கி வாடிக்கையாளர்களின் தகவல் திருட்டு? உண்மை என்னன்னு பாருங்க!

எச்டிஎஃப்சி வங்கி (HDFC Bank) வாடிக்கையாளர்களின் தகவல்கள் திருடப்பட்டுவிட்டதாக (Data breach) தகவல் வெளியானதை தொடர்ந்து, வாடிக்கையாளர்களின் தகவல்கள் திருடப்படவில்லை எனவும், வாடிக்கையாளர்களின் தகவல்கள் பாதுகாப்பாக இருப்பதாகவும் எச்டிஎஃப்சி வங்கி விளக்கம் அளித்துள்ளது.

எச்டிஎஃப்சி வங்கி

இந்தியாவின் மிகப்பெரிய தனியார் வங்கியான எச்டிஎஃப்சி வங்கிக்கு பல லட்சக்கணக்கான வாடிக்கையாளர்கள் இருக்கின்றன. மேலும் இந்தியா முழுவதும் பல்லாயிரக்கணக்கான வங்கிக் கிளைகள் எச்டிஎஃப்சி வங்கிக்கு இருக்கின்றன.

எச்டிஎஃப்சி வங்கி தகவல் திருட்டு

எச்டிஎஃப்சி வங்கியின் லட்சக்கணக்கான வாடிக்கையாளர்களின் தகவல்களை ஹேக்கர்கள் திருடிவிட்டதாக சில தகவல்கள் வெளியாகியுள்ளன. இந்த தகவல்கள் டார்க் வெப்பில் (Dark web) விற்பனைக்காக வைக்கப்பட்டிருப்பதாகவும் சில செய்திகள் வெளியாகின.

வாடிக்கையாளர்களின் தகவல்கள் விற்பனை?

எச்டிஎஃப்சி வங்கி வாடிக்கையாளர்களின் முழு பெயர், இமெயில் ஐடி, வீட்டு முகவரி, நிதி விவரங்கள் என முக்கிய தகவல்கள் டார்க் வெப்பில் வெளியாகியுள்ளதாகவும், இந்த தகவல்கள் அனைத்தையும் விற்பனை செய்ய பெரிய தொகை கேட்கப்படுவதாகவும் தகவல் வெளியாகியது.

எச்டிஎஃப்சி வங்கி விளக்கம்

இந்நிலையில், எச்டிஎஃப்சி வங்கி வாடிக்கையாளர்களின் விவரங்கள் கசியவில்லை எனவும், 6 லட்சம் வாடிக்கையாளர்களின் தனிநபர் விவரங்கள் அனைத்தும் பாதுகாப்பாக இருப்பதாகவும் எச்டிஎஃப்சி வங்கி விளக்கம் அளித்துள்ளது.

தகவல்கள் பாதுகாப்பாக இருக்கின்றன

இதுகுறித்து எச்டிஎஃப்சி வங்கி ட்விட்டரில், “எச்டிஎஃப்சி வங்கி மற்றும் எங்கள் அமைப்புகளில் இருந்து தகவல்கள் கசியவும் இல்லை, அனுமதியின்றி யாரும் நுழையவும் இல்லை. எங்கள் அமைப்புகள் மீது முழு நம்பிக்கை இருக்கிறது. வாடிக்கையாளர்களின் தகவல் பாதுகாப்புக்கு தொடர்ந்து முக்கியத்துவம் அளித்து வருகிறோம்” என்று தெரிவித்துள்ளது.