ஹெச்.டி.எஃப்.சி. வங்கியின் லாபம் எவ்வளவு தெரியுமா?

இந்திய வங்கிகள் நீண்ட காலமாகவே வாராக் கடன் பிரச்சினையாலும், போதிய வருவாய் ஈட்ட முடியாமலும் தவித்து வருகின்றன. அதோடு போலியான ஆவணங்களைக் கொண்டு கடன் வாங்கி விட்டு திருப்பிச் செலுத்தாமல் நாட்டை விட்டே தப்பியோடும் சம்பவங்களும் நடைபெற்று வருகின்றன. இதுபோன்ற சூழலில் கடைசி காலாண்டில் வங்கிகள் இழப்புகளிலிருந்து மீளத் தொடங்கியுள்ளன. இந்தியாவின் மிகப் பெரிய தனியார் துறை வங்கியான ஹெச்.டி.எஃப்.சி. 2019 அக்டோபர் - டிசம்பர் காலாண்டில் 24 சதவீதம் கூடுதலான அளவில் லாபம் ஈட்டியுள்ளது.

பங்குச் சந்தையில் ஹெச்.டி.எஃப்.சி. வெளியிட்டுள்ள அறிக்கையின் படி, அக்டோபர் - டிசம்பர் காலாண்டில் அவ்வங்கியின் நிகர லாபம் ரூ.4,196.48 கோடியாக உயர்ந்துள்ளது. இவ்வங்கி 2018ஆம் ஆண்டின் இதே காலகட்டத்தில் ரூ.3,377.05 கோடி மட்டுமே லாபம் ஈட்டியிருந்தது. வங்கியின் ஒட்டுமொத்த வருவாய் ரூ.24,653.15 கோடியிலிருந்து ரூ.29,073.19 கோடியாக அதிகரித்திருக்கிறது. ஹெச்.டி.எஃப்.சி. வங்கியின் வருவாய் விவரங்கள் வெளியிடப்பட்ட பின்னர், மும்பை பங்குச் சந்தையில் அதன் பங்கு ஒன்றின் விலை 2.25 சதவீதம் வளர்ச்சி கண்டு ரூ.2,395.80 கோடியாக இருந்தது.

மனிதர்கள் வேண்டாம்... ரோபோக்கள் போதும்... ஆய்வில் அதிர்ச்சித் தகவல்!

சில தினங்களுக்கு முன்னர் இந்தியாவின் இரண்டாவது மிகப் பெரிய தனியார் துறை வங்கியான ஐசிஐசிஐ வங்கி தனது அக்டோபர் - டிசம்பர் காலாண்டுக்கான வருவாய் விவரங்களை வெளியிட்டிருந்தது. 2019 அக்டோபர் - டிசம்பரில் மொத்தம் ரூ.4,670 கோடி லாபம் ஈட்டியிருந்தது. இது 2018 அக்டோபர் - டிசம்பர் மாதங்களில் கிடைத்த ரூ.1,874 கோடி லாபத்தை விட இரண்டு மடங்குக்கு மேல் அதிகமாகும். ஐசிஐசிஐ வங்கியின் வட்டி வாயிலான வருவாய் ரூ.8,545 கோடியாக இருந்துள்ளது. இதர வருவாய் 18.77 சதவீதம் உயர்ந்து ரூ.4,363 கோடியாக இருக்கிறது. ஐசிஐசிஐ வங்கியின் செயற்படா சொத்து மதிப்பு 2018 அக்டோபர் - டிசம்பரில் 7.75 சதவீதத்திலிருந்து 2019 அக்டோபர் - டிசம்பரில் 5.95 சதவீதமாகக் குறைந்துள்ளது. இவ்வங்கியின் வாராக் கடன் அளவு ரூ.4,088 கோடியாக இருக்கிறது.

நடப்பு நிதியாண்டில் மட்டும் ஐசிஐசிஐ வங்கி புதிதாக 400 வங்கிக் கிளைகளை அமைத்துள்ளது. இதன்மூலம் அவ்வங்கியின் மொத்தக் கிளைகளின் எண்ணிக்கை 5,275 ஆக அதிகரித்துள்ளது.