பொங்கல் போணியை கெடுத்த பனி.. அய்யலூர் ஆட்டு சந்தையில் அதிருப்தி!

கடும் பனி தாக்கத்தின் காரணமாக அய்யலூர் ஆட்டுச் சந்தையில் ஆடுகள் வரத்து குறைந்துள்ளது. இந்த சந்தையில் ஒவ்வொரு ஆண்டும் வழக்கமாக 5 கோடி முதல் 6 கோடி ரூபாய்க்கு ஆடுகள் விற்பனையாகும். இந்த சூழலில் இந்த ஆண்டு பொங்கல் ஆட்டுச் சந்தையில் விற்பனை இன்று ஒரு கோடி ரூபாய்க்கு குறைவாக விற்பனையானதால் வியாபாரிகள் அதிர்ச்சி அடைந்துள்ளனர்.

தமிழர் திருநாளாம் பொங்கல் பண்டிகை நெருங்கிவிட்டது. வழக்கமாகவே பொங்கல் என்றால் அரிசி தானியங்கள், காய்கறிகள், கரும்பு, மஞ்சள், வெல்லம் போன்ற பொருட்களின் வியாபாரம் விறுவிறுப்புடன் நடைபெறும். மேலும், மீன், கோழி, ஆடு போன்றவற்றின் வியாபாரமும் சூடுபிடிக்கும்.

திண்டுக்கல் மாவட்டம் வேடசந்தூரில் உள்ளது அய்யலூர். இப்பகுதியில் வாராவாரம் வியாழக் கிழமை அன்று ஆட்டு சந்தை நடைபெறும் இந்த ஆட்டுச் சந்தைக்கு திண்டுக்கல் மாவட்டம் மட்டுமல்லாமல் கரூர், திருச்சி, புதுக்கோட்டை, மதுரை, தேனி உள்ளிட்ட சுற்றுவட்டார மாவட்டங்களில் இருந்தும் ஆடுகள் வாங்குவதற்காக வியாபாரிகளும், வாடிக்கையாளர்களும் வருவார்கள்.

பொங்கல் வந்தாலே குஷிதான்.. களைகட்டிய ஜவுளி மார்க்கெட்!
இந்த ஆட்டுச் சந்தைக்கு ஆயிரக்கணக்கான ஆடுகள் கொண்டு வரப்பட்டு பண்டிகை காலங்களான பொங்கல், தீபாவளி, ரம்ஜான், பக்ரீத், கிறிஸ்துமஸ் போன்ற காலங்களில் சுமார் ஆறு கோடி ரூபாய்க்கு மேல் ஆடுகள் விற்பனை நடைபெறும்

இந்நிலையில் வரும் பொங்கல் பண்டிகை முன்னிட்டு ஆடுகள் வரத்து அதிகம் இருக்கும் என்ற சூழ்நிலையில் இன்று வார சந்தைக்கு கடும் பனி தாக்கம் காரணமாக ஆடுகளின் வரத்து குறைவாக இருந்தது. மறுபக்கம், வியாபாரிகள் அதிக அளவு இருந்த நிலையில் ஆடுகள் வரத்து இல்லாத காரணத்தால் இன்று ஒரு கோடி ரூபாய்க்கு குறைவாகவே ஆடுகள் விற்பனையானது. இதனால் வியாபாரிகள் மற்றும் பொதுமக்கள் அதிருப்தி அடைந்தனர்.