கொரோனாவைத் தாண்டி பைக் விற்பனை ஜோர்!

மார்ச் மாத இறுதியில் கொரோனா பாதிப்பால் ஊரடங்கு அமல்படுத்தப்பட்ட பின்னர் ஆட்டோமொபைல் விற்பனை முற்றிலும் முடங்கியது. ஊரடங்கு தளர்த்தப்பட்ட பின்னரும் நிதி நெருக்கடியால் வாகனம் வாங்கவே மக்கள் தயக்கம் காட்டினர். இதனால் கார், பைக் விற்பனை மந்தமாகவே இருந்தது. இந்நிலையில், சென்ற அக்டோபர் மாதத்தில் வரவேற்கத்தக்க விதமாக வாகன விற்பனையில் பெரும் வளர்ச்சி ஏற்பட்டுள்ளது. குறிப்பாக இருசக்கர வாகன விற்பனை சூடுபிடித்துள்ளது. இந்திய இருசக்கர வாகனச் சந்தையில் முன்னிலை வகிக்கும் ஹீரோ மோட்டோ கார்ப் நிறுவனம் தனது அக்டோபர் மாத விற்பனை விவரங்களை வெளியிட்டுள்ளது. அதன்படி, ஒரு மாதத்தில் இந்நிறுவனம் 8 லட்சம் வாகனங்களை விற்பனை செய்து சாதனை படைத்துள்ளது.

2020 அக்டோபர் மாதத்தில் இந்நிறுவனம் மொத்தம் 8,06,848 வாகனங்களை விற்பனை செய்துள்ளது. இது 2019 அக்டோபர் மாத விற்பனையை விட 35 சதவீதம் அதிகமாகும். 2019 அக்டோபரில் மொத்தம் 5,99,248 வாகனங்கள் மட்டுமே விற்பனை செய்யப்பட்டிருந்தன. இதன் மூலம் மாதாந்திர அடிப்படையில் மிக அதிகமான விற்பனையை அக்டோபர் மாதத்தில் ஹீரோ மோட்டோ கார்ப் நிறுவனம் பதிவுசெய்துள்ளது. மோட்டார் சைக்கிள்களுக்கான தேவை இப்போது மக்களிடையே அதிகரித்துள்ளதாகவும், அரசின் கொள்கைகள் தங்களது விற்பனையை அதிகரிக்க உதவியாக இருப்பதாகவும் ஹீரோ மோட்டோ கார்ப் நிறுவனம் தெரிவித்துள்ளது.

சமையல் சிலிண்டர் புக்கிங்: புதிய விதிமுறை என்ன தெரியுமா?

இருசக்கர வாகன விற்பனையில், மோட்டார் சைக்கிள்கள் மட்டும் 7.32 லட்சம் என்ற எண்ணிக்கையில் விற்பனையாகியுள்ளன. 2019 அக்டோபரில் மொத்தம் 5.5 லட்சம் மோட்டார் சைக்கிள்கள் மட்டுமே விற்பனையாகியிருந்தன. அதேபோல, ஸ்கூட்டர் விற்பனை எண்ணிக்கை 2019 அக்டோபரில் 46,576லிருந்து 2020 அக்டோபரில் 74,350 ஆக உயர்ந்துள்ளது. ஒட்டுமொத்தமாகப் பார்த்தால், இதுவரையில் மொத்தம் 29.39 லட்சம் மோட்டார் சைக்கிள்களையும், 2.45 லட்சம் ஸ்கூட்டர்களையும் இந்நிறுவனம் விற்பனை செய்துள்ளது. மோட்டார் சைக்கிள்கள் பிரிவில் கிளாமர், பேஷன், ஸ்பிளெண்டர், எக்ஸ்ட்ரீம் ஆகிய வண்டிகளும், ஸ்கூட்டர் பிரிவில் பிளசர், டெஸ்டினி, மேஸ்ட்ரோ போன்ற வண்டிகளும் அதிகமான அளவில் விற்பனை செய்யப்பட்டு வருகின்றன.