ஹிண்டன்பர்க் அடுத்த தாக்குதல்.. புதிய ரிப்போர்ட் வரப்போவதாக எச்சரிக்கை.. அதானிக்கு பின் யார்?

விரைவில் புதிய ரிப்போர்ட் ஒன்று வெளியாக இருப்பதாகவும், இப்புதிய ரிப்போர்ட் மிகப்பெரிய விவகாரம் எனவும் ஹிண்டன்பர்க் ஆய்வு (Hindenburg Research) நிறுவனம் தெரிவித்துள்ளது.

அமெரிக்காவை சேர்ந்த ஹிண்டன்பர்க் ஆய்வு நிறுவனம் ஜனவரி 24ஆம் தேதி அதானி குழுமம் குறித்து ஆய்வறிக்கை ஒன்றை வெளியிட்டது. இதில், அதானி குழுமம் பல்வேறு மோசடிகள், முறைகேடுகளில் ஈடுபட்டதாக குற்றம்சாட்டியது.

ஹிண்டன்பர்க் அறிக்கை வெளியானபின் அதானி குழுமம் கடுமையான நெருக்கடியை சந்தித்தது. அதானி நிறுவனங்களின் பங்குகள் மிக மோசமாக சரிந்துவிட்டன. அதானி குழுமத் தலைவர் கவுதம் அதானி சொத்து மதிப்பு பாதிக்கு மேல் குறைந்துவிட்டது.

அதானி கடன் பத்திரங்களின் மதிப்பும் சரிந்தது. பின்னர் முதலீட்டாளர்களின் நம்பிக்கையை பெறுவதற்காக அதானி குழுமம் கடன்களை அடைத்து வருகிறது. மேலும், முதலீட்டாளர்களை கவர உலகம் முழுவதும் ஹாங் காங், சிங்கப்பூர், லண்டன், துபாய் போன்ற நிதி நகரங்களில் நிகழ்ச்சிகளை நடத்தி வருகிறது.

ஹிண்டன்பர்க் அறிக்கையின் தாக்கத்தில் இருந்து அதானி குழுமம் இன்னும் முழுமையாக வெளியே வரவில்லை. இந்த சூழலில், ஹிண்டன்பர்க் நிறுவனம் மற்றொரு அறிக்கையை விரைவில் வெளியிடப்போவதாக தெரிவித்துள்ளது.

இதுகுறித்து ஹிண்டன்பர்க் நிறுவனம் ட்விட்டரில், “விரைவில் புதிய ஆய்வறிக்கை வெளியாக இருக்கிறது. இதுவும் மற்றொரு பெரிய விஷயம்தான்” என்று தெரிவித்துள்ளது.

எனினும், எந்த நிறுவனம் பற்றிய ஆய்வறிக்கையை ஹிண்டன்பர்க் வெளியிடப்போகிறது என்பது பற்றிய தகவல் வெளியாகவில்லை. அதானி குழுமம் பற்றி மற்றொரு அறிக்கையை ஹிண்டன்பர்க் வெளியிடப்போகிறதா அல்லது வேறு நிறுவனம் மீது தாக்குதல் நடத்தப்போகிறதா என்பது தெளிவாக தெரியவில்லை. எனினும், ஹிண்டன்பர்க் புதிய அறிக்கை வெளியிடப்போவதாக தெரிவித்துள்ளது கார்ப்பரேட் வட்டாரங்களில் பரபரப்பை ஏற்படுத்தியுள்ளது.