வேலையை வாரி வழங்கும் நிறுவனங்கள்... வேலை தேடுவோர் ஹேப்பி!

இந்தியாவில் வேலையில்லாத் திண்டாட்டம் என்பது நீண்ட காலமே பெரும் பிரச்சினையாக இருந்து வருகிறது. 2016ஆம் ஆண்டில் பணமதிப்பழிப்பு நடவடிக்கை மேற்கொள்ளப்பட்ட பிறகு நிலைமை இன்னும் மோசமானது. இந்நிலையில் சென்ற ஆண்டின் தொடக்கத்தில் இந்தியாவில் விஸ்வரூபம் எடுத்த கொரோனா வைரஸ் நாட்டு மக்கள் அனைவரின் வேலையையும் பறித்தது. புதிய வேலைவாய்ப்புகளும் கேள்விக்குறியானது. கொரோனா பாதிப்புகள் குறைந்து இயல்பு நிலை திரும்பிய சூழலிலும் வேலைவாய்ப்புகள் குறிப்பிடத்தகுந்த அளவில் அதிகரிக்கவில்லை. பலருக்கு சம்பள உயர்வும் இல்லாமல் போனது.

இந்நிலையில், ஜூலை மாதத்தில் புதிய வேலைவாய்ப்புகள் அதிகரித்துள்ளதாக ஆன்லைன் வேலை தேடுதல் தளமான நவ்கரி.காம் தனது ஆய்வில் தெரிவித்துள்ளது. பொருளாதார நடவடிக்கைகள் அதிகரித்ததன் காரணமாக ஜூலை மாதத்தில் வேலை தேடுதல் குறியீடு 11 சதவீதம் அதிகரித்துள்ளது. கடந்த சில ஆண்டுகளில் இது மிகப் பெரிய வளர்ச்சியாகும். துறை வாரியாகப் பார்த்தால் ஐடி மென்பொருள் துறையில் 18 சதவீத வளர்ச்சி ஏற்பட்டுள்ளது. முன்னதாக ஜூன் மாதத்திலும் கொரோனாவுக்கு முந்தைய அளவுடன் ஒப்பிடும்போது 52 சதவீத வளர்ச்சி இருந்தது. மாதாந்திர அடிப்படையில் பார்த்தால் மே மாதத்தை விட ஜூன் மாதத்தில் 11 சதவீதமும், ஜூலை மாதத்திலும் 14 சதவீதமும் வளர்ச்சி காணப்பட்டது.

நகைக் கடன் வட்டித் தள்ளுபடி... ஹேப்பி நியூஸ்!!
உணவகம், தங்கும் விடுதிகள், விமானம், போக்குவரத்து ஆகிய துறைகளில் 36 சதவீத வளர்ச்சி ஏற்பட்டுள்ளது. சில்லறை வர்த்தகத் துறையில் 17 சதவீதமும், கணக்குப் பதிவு/ வரிகள் துறையில் 27 சதவீதமும், வேகமாக விற்பனையாகும் நுகர்பொருள் துறையில் 17 சதவீதமும், வங்கி மற்றும் நிதிச் சேவைகள் துறையில் 13 சதவீதமும், கல்வி மற்றும் கற்பித்தல் துறையில் 8 சதவீதமும் வளர்ச்சி ஏற்பட்டுள்ளது. எனினும் மருந்துத் துறையில் 5 சதவீதமும், ஊடகம் மற்றும் பொழுதுபோக்குத் துறையில் 15 சதவீதமும் வீழ்ச்சி ஏற்பட்டுள்ளது.