வளரும் பொருளாதாரம்... உயரும் வேலைவாய்ப்பு!

இந்தியாவில் வேலையின்மை பிரச்சினை கடந்த சில ஆண்டுகளாகவே அதிகமாக இருக்கிறது. போதிய அளவில் வேலைவாய்ப்புகள் உருவாக்கப்படுவதில்லை எனவும், உழைப்புக்கேற்ற ஊதியம் இல்லை எனவும் பல்வேறு குற்றச்சாட்டுகள் மத்திய அரசின் மீது சுமத்தப்பட்டு வருகின்றன. இது போன்ற சூழலில் திடீரெனத் தோன்றிய கொரோனா வைரஸ் வேலையின்மைப் பிரச்சினையை இன்னும் அதிகமாக்கியது. மார்ச் மாதத்தில் கொரோனா பீதியால் ஊரடங்கு உத்தரவு அமல்படுத்தப்பட்ட நிலையில், தொழில் துறைகள் முடங்கி வேலைவாய்ப்புகள் இல்லாமல் போய்விட்டது.

அதைத் தொடர்ந்த மாதங்களிலும் இதே நிலை நீடித்ததால் பொருளாதார வளர்ச்சியை மேம்படுத்தவும், வேலைவாய்ப்புகளை உயர்த்தவும் மத்திய அரசு நடவடிக்கை மேற்கொண்டது. மூன்று கட்டங்களாகப் பொருளாதாரச் சலுகைகளும் அறிவிக்கப்பட்டன. இதுபோன்ற நடவடிக்கைகளால் சென்ற செப்டம்பர் மாதத்தில் வேலைவாய்ப்புகளில் 18 சதவீதம் வளர்ச்சி ஏற்பட்டுள்ளதாக ஆன்லைன் வேலை தேடுதல் தளமான லிங்க்டு.இன் கூறியுள்ளது. செப்டம்பர் மாதத்தில் பணியமர்த்தும் குறியீடு 30 சதவீதத்தை நெருங்கியுள்ளது.

முன்னதாக ஏப்ரல் மாதத்தில் பணியமர்த்துதல் குறியீடு 50 சதவீதம் வீழ்ச்சி கண்டிருந்தது. ஆகஸ்ட் மாதத்தில்தான் மீண்டும் வளர்ச்சி ஏற்பட்டு 12 சதவீதத்தை எட்டியது. தொழில் துறை நடவடிக்கைகள் இயல்பு நிலைக்குத் திரும்பியுள்ளதாலும், பொருளாதார வளர்ச்சி மேம்பட்டு வருவதாலும் அடுத்து வரும் மாதங்களிலும் வேலைவாய்ப்புகள் இன்னும் அதிகரிக்கும் என்று இந்த ஆய்வில் கூறப்பட்டுள்ளது. கொரோனா பாதிப்புகள் மிக அதிகமாக இருந்த சமயத்திலும் டிஜிட்டல் திறன்களில் முக்கியத்துவம் பெற்றவர்கள் பெரிய அளவில் பாதிப்பைச் சந்திக்கவில்லை எனவும், இதுபோன்ற திறன்களை வளர்த்துக்கொள்ள வேண்டும் எனவும் இந்த ஆய்வில் ஆலோசனை தெரிவிக்கப்பட்டுள்ளது.