​ஓய்வூதிய திட்டம்.. தனியார் ஊழியர்கள் எப்படி திட்டமிட்டு பென்சன் பெறுவது?

தேசிய ஓய்வூதிய திட்டம் (NPS) 2004ஆம் ஆண்டில் அரசு ஊழியர்களுக்காக அறிமுகப்படுத்தப்பட்டது. பின்னர் 2009ஆம் ஆண்டில் தனியார் ஊழியர்களும் தேசிய ஓய்வூதிய திட்டத்தில் முதலீடு செய்ய அனுமதிக்கப்பட்டது. 18 வயது முதல் 65 வயது வரையிலானவர்கள் தேசிய ஓய்வூதிய திட்டத்தில் பங்கேற்று பயன்பெறலாம்.

தேசிய ஓய்வூதிய திட்டத்தில் முதலீடு செய்வோருக்கு பிரான் எண் (PRAN Number) எனப்படும் நிரந்தர ஓய்வூதிய கணக்கு எண் வழங்கப்படும். பயனாளியின் வாழ்க்கை முழுவதும் இந்த நிரந்தர ஓய்வூதிய கணக்கு என் நடைமுறையில் இருக்கும்.

தனியார் ஊழியர்கள் வேறு வேலைகளுக்கு மாறினாலும், வேறு நிறுவனத்துக்கு மாறினாலும் தேசிய ஓய்வூதிய திட்டத்தில் உள்ள நிதியும், பலன்களுக்கும் எந்த பாதிப்பும் ஏற்படாது. எளிதாக புதிய நிறுவனத்துக்கும் உங்களது ஓய்வூதிய நிதியை மாற்றிக்கொள்ளலாம்.

பயனாளி பணி ஓய்வுபெறும்போது தனது தேசிய ஓய்வூதிய திட்ட கணக்கில் உள்ள பணத்தை எடுத்து ஆண்டுத்தொகையில் (Annuity) முதலீடு செய்து நிலையான ஓய்வூதிய வருமானம் பெறலாம்.

தேசிய ஓய்வூதிய திட்டத்தில் முதலீடு செய்யும் நபர்களுக்கு, வருமான வரிச் சட்டம் பிரிவு 80CCD (1) கீழ் ஆண்டுக்கு 1.5 லட்சம் ரூபாய் வரை வருமான வரி விலக்கு கிடைக்கிறது. இதுமட்டுமல்லாமல் பிரிவு 80CCD (1B) கீழ் கூடுதலாக 50,000 ரூபாயும் வருமான வரி விலக்கு கிடைக்கிறது. ஆக, தேசிய ஓய்வூதிய திட்டம் வாயிலாக ஆண்டுக்கு 2 லட்சம் ரூபாய் வரை வருமான வரி சேமிக்கலாம்.