மக்களுக்கான பயோமெட்ரிக் அடையாள அட்டையான ஆதார் கார்டை மத்திய அரசின் UIDAI எனப்படும் ஆதார் ஆணையம் விநியோகிக்கிறது. இதுமட்டுமல்லாமல், புதிதாக ஆதார் கார்டு பெற விரும்புவோருக்கும், ஏற்கெனவே ஆதார் கார்டு பெற்றவர்களுக்கும் ஆன்லைனில் பல்வேறு சேவைகளை ஆதார் ஆணையம் வழங்குகிறது.

இதன்படி, ஆதார் அட்டையில் முகவரி மாற்றுவது, முகவரியை திருத்துவது உள்ளிட்ட பல்வேறு வேலைகளை ஆன்லைனிலேயே முடித்துக்கொள்ளலாம். இதற்கு தேவையான ஆவணங்களை டிஜிட்டல் முறையில் பதிவேற்றி வேலையை ஈசியாக முடித்துவிடலாம்.

ஏற்கெனவே பதிவு செய்துகொண்டவர்கள் ஆதார் ஆணையத்தின் இணையதளம் uidai.gov.in அல்லது மொபைல் ஆப் mAadhaar மூலம் முகவரியை மாற்றியும், திருத்தியும் கொள்ளலாம். ஆதார் எண்ணுடன் மொபைல் எண் இணைக்கப்பட்டிருந்தால், ஆன்லைனிலேயே முகவரியை மாற்றிவிடலாம் என்று ஆதார் ஆணையமே அண்மையில் அறிவித்திருக்கிறது.


இனி வங்கிக்கும் போகத் தேவையில்லை - மினிமம் பேலன்ஸும் வேண்டாம்!

ஆன்லைனில் எப்படி முகவரியை மாற்றுவது என்பதை பற்றி பார்க்கலாம். முதலில் ஆதார் ஆணையத்தின் uidai.gov.in இணையதளத்தில், 'update your address online’ என்ற ஆப்ஷனை தேர்வு செய்து அதில் ‘update Aadhaar’ என்ற ஆப்ஷனை கிளிக் செய்ய வேண்டும்.

அதில், உங்களது மொபைல் எண்ணை கொடுக்க வேண்டும். உடனே உங்கள் மொபைலுக்கு வரும் ஓடிபி பாஸ்வோர்டை கொடுத்து பூர்த்தி செய்ய வேண்டும். இப்போது ‘address update' ஆப்ஷனை கிளிக் செய்து அதில் கேட்கப்பட்டிருக்கும் விவரங்களை பூர்த்தி செய்ய வேண்டும். மேலும், கேட்கப்படும் ஆவணங்களின் டிஜிட்டல் நகலை பதிவேற்ற வேண்டும்.

இதன்பின் உங்களது புதிய முகவரி பதிக்கப்பட்ட ஆதார் கார்டு புதிய முகவரிக்கே அனுப்பப்படும். உங்கள் மொபைல் எண்ணை ஆதாருடன் இணைக்கவில்லை என்றால், அருகே ஆதார் மையத்தில்தான் முகவரியை மாற்ற முடியும்.