PF பேலன்ஸ் பார்க்க ஈசி வழி... ஒரு SMS போதும்!

தற்போது கொரோனா இரண்டாம் அலை தீவிரமாக இருப்பதால் பிஎஃப் உறுப்பினர்கள் தங்களது சேமிப்புத் தொகையை கோவிட் -19 அட்வான்ஸ் தொகையாக எடுத்துக்கொள்ள அனுமதி வழங்கப்பட்டுள்ளது. இதுகுறித்த அறிவிப்பை மத்திய தொழிலாளர் அமைச்சகம் சமீபத்தில் வெளியிட்டது. சென்ற ஆண்டில் கரீப் கல்யாண் யோஜனா திட்டத்தின் கீழ் இச்சலுகை வழங்கப்பட்ட நிலையில், அதே சலுகை தற்போது நீட்டிக்கப்படுவதாக அரசு தரப்பில் தெரிவிக்கப்பட்டுள்ளது. இது பிஎஃப் உறுப்பினர்கள் மத்தியில் வரவேற்பைப் பெற்றுள்ளது. இதனால் நிறையப் பேர் தங்களது பிஎஃப் பணத்தை எடுக்க விரும்புவர்.

அதற்கு முன்பாக, தங்களது பிஎஃப் கணக்கில் எவ்வளவு பணம் உள்ளது என்று தெரிந்துகொள்ள நினைப்பார்கள். அதற்கு எங்கும் அலையத் தேவையில்லை. ஆன்லைனிலும் முயற்சிக்க வேண்டாம். சாதாரண எஸ்.எம்.எஸ். போதும். பிஎஃப் எண்ணுடன் பதிவுசெய்யப்பட்ட மொபைல் எண் மூலமாக ஈசியாக பேலன்ஸ் பார்க்கலாம். அந்த மொபைல் எண்ணிலிருந்து 7738299899 என்ற எண்ணுக்கு எஸ்.எம்.எஸ். அனுப்ப வேண்டும்.

இந்த வசதி தமிழ், ஆங்கிலம், இந்தி, பஞ்சாபி, குஜராத்தி, மராத்தி, கன்னடா, மலையாளம், தெலுங்கு, பெங்காலி உள்ளிட்ட 10 மொழிகளில் கிடைக்கிறது.

EPFOHO UAN LAN என்று எஸ்.எம்.எஸ். அனுப்ப வேண்டும். இதில் LAN என்பது நாம் தேர்ந்தெடுக்கும் மொழியின் முதல் மூன்று எழுத்துகள் ஆகும். உதாரணமாக, தமிழில் பெற வேண்டுமென்றால், EPFOHO UAN TAM என்று அனுப்ப வேண்டும்.

இவ்வாறு டைப் செய்து 7738299899 என்ற எண்ணுக்கு எஸ்.எம்.எஸ். அனுப்பியவுடனேயே பதிவுசெய்யப்பட்ட வாடிக்கையாளரின் மொபைல் எண்ணுக்கு பிஎஃப் பேலன்ஸ், கடைசி டெபாசிட் தொகை உள்ளிட்ட விவரங்கள் வந்து சேரும்.