பிஎஃப் பணத்தை புதிய கணக்குக்கு மாற்றுவது எப்படி?

பிஎஃப் சேவையுடன் பதிவு செய்யப்பட்ட நிறுவனம் ஒன்றில் நீங்கள் வேலைக்குச் சேர்ந்து பணியாற்றினால், அந்நிறுவனத்தில் உங்களது சம்பளத்திலிருந்து ஒவ்வொரு மாதமும் குறிப்பிட்ட தொகையை உங்களின் சார்பாகவும், அதே தொகையை நிறுவனம் சார்பாகவும் உங்களது பிஎஃப் கணக்கில் சேமித்து வைக்கப்படும். இந்த நிதியை நீங்கள் திரும்பப் பெறும் வரை அதற்கு வட்டியும் கிடைக்கிறது. பல்வேறு காரணங்களுக்காக நீங்கள் அந்த நிறுவனத்திலிருந்து விலகி வேறு நிறுவனத்தில் இணைந்துவிட்டீர்கள் என்றால், நீங்கள் அந்த பிஎஃப் பணத்தைத் திரும்பப் பெறுவதற்குப் பதிலாக பிஎஃப் நிலுவைத் தொகையை புதிய கணக்குக்கு மாற்றலாம். அது எப்படி என்று இங்கே பார்க்கலாம்...

>> பிஎஃப் அமைப்பின் அதிகாரப்பூர்வ இணையதளமான https://unifiedportal-mem.epfindia.gov.in/ என்ற இணைப்பில் சென்று, பிஎஃப் நம்பர் மற்றும் பாஸ்வேர்டை பதிவிட்டு உள்நுழைய வேண்டும்.

>> பிஃஎப் கணக்கில் உள்நுழைந்த பிறகு ‘Online services’ என்ற மெனுவுக்குள் சென்று ’One Member – One EPF Account’ என்பதை தேர்ந்தெடுக்க வேண்டும். அதில் தனிநபர் விவரங்கள் மற்றும் நடப்பு வேலைக்கான பிஃஎப் கணக்கை சரிபார்க்க வேண்டும்.

>> முந்தைய நிறுவனத்தின் கணக்கு விவரங்களைப் பதிவிட்டு ‘Get details’ என்பதை கிளிக் செய்ய வேண்டும்.

>> பின்னர், முந்தைய நிறுவன ஊழியர் அல்லது நடப்பு நிறுவன ஊழியர் என்பதை தேர்வு செய்ய வேண்டும்.

>> உடனே ‘Get OTP’ என்பதை கிளிக் செய்தால் பிஎஃப் எண்ணுடன் இணைக்கப்பட்டுள்ள உங்களது மொபைல் எண்ணுக்கு பாஸ்வர்டு அனுப்பப்படும். அதைப் பதிவிட்டு ‘Submit’ பட்டனை கிளிக் செய்ய வேண்டும்.

பிஃஎப் கணக்கை இணைப்பதற்கான கோரிக்கைக்கு நிறுவனம் ஒப்புதல் வழங்கிய பிறகு, முந்தைய நிறுவனத்தின் பிஃஎப் கணக்கிலிருந்த பணம் தற்போது நீங்கள் வேலை செய்யும் நிறுவனத்தின் பிஎஃப் கணக்குடன் இணைக்கப்பட்டு விடும். இதற்கு 30 நாட்கள் வரை ஆகும். பிஎஃப் கணக்கு மாறிய பிறகு குறுஞ்செய்தி மூலமாக உங்களது மொபைல் எண்ணுக்கு தகவல் வரும்.