தங்க நகைகள் செல்லாது.. அப்போ பழைய நகைகளை என்ன செய்வது?

தங்க நகைகள் விற்பனை செய்வதற்கான விதிமுறைகளை மத்திய அரசு திருத்தியுள்ளது. இதன்படி, வரும் ஏப்ரல் 1ஆம் தேதி முதல் HUID பதிக்கப்பட்ட நகைகள் மட்டுமே விற்பனை செய்யப்பட வேண்டும் எனவும், HUID பதிக்கப்படாத நகைகளை விற்பனை செய்ய தடை விதித்து மத்திய அரசு உத்தரவிட்டது.

HUID என்றால் என்ன?

HUID என்பது ஹால்மார்க் அடையாள எண் (Hallmark Unique Identification). தங்க நகைகளுக்கு 2021ஆம் ஆண்டு ஜூன் மாதம் வரை ஹால்மார்க் முத்திரை கட்டாயம் இல்லை. எனினும் அதன்பிறகு ஹால்மார்க் முத்திரை பதித்த நகைகளை மட்டுமே விற்பனை செய்ய வேண்டும் என மத்திய அரசு உத்தரவிட்டது. மேலும் 2021 ஜூலை 1ஆம் தேதி முதல் HUID என்ற ஹால்மார்க் அடையாள எண் அறிமுகப்படுத்தப்பட்டது.

ஹால்மார்க் என்பது தங்க நகையின் தரத்தையும், தூய்மையையும் உறுதி செய்கிறது. ஹால்மார்க் அடையாள எண் என்பது ஒவ்வொரு நகையிலும் பதிக்கப்படும் 6 இலக்க தனித்துவமான எண்ணெழுத்து அடையாள எண் ஆகும்.

எனவே, ஒவ்வொரு நகையிலும் ஹால்மார்க் முத்திரையும், HUID என்ற ஹால்மார்க் அடையாள எண்ணும் கட்டாயமாக பதிக்கப்பட்டிருக்க வேண்டும். இத மூலம் நீங்கள் வாங்கும் தங்கம் தரமானது என்பதையும், அதன் தூய்மையையும் உறுதி செய்யலாம்.

தங்க நகை விற்பனைக்கு விதிமுறை

இந்நிலையில், ஹால்மார்க் முத்திரை மட்டுமல்லாமல் HUID ஹால்மார்க் அடையாள எண்ணும் பதிக்கப்பட்ட நகைகளை மட்டுமே ஏப்ரல் 1ஆம் தேதி முதல் விற்பனை செய்ய வேண்டும் என மத்திய அரசு தெரிவித்துள்ளது.

பழைய தங்க நகைகளுக்கு என்னாகும்?

ஹால்மார்க் அடையாள எண் பதிக்கப்பட்ட நகைகளை மட்டுமே விற்பனை செய்ய வேண்டும் என மத்திய அரசு தெரிவித்துள்ள நிலையில், பொதுமக்களிடம் இருக்கும் பழைய நகைகளை என்ன செய்வது என மக்களிடையே குழப்பம் ஏற்பட்டுள்ளது.

இதற்கு மத்திய அரசே விளக்கமும் தெரிவித்துள்ளது. அதாவது, பொதுமக்களிடம் இருக்கும் ஹால்மார்க் முத்திரை இல்லாத தங்க நகைகள் தொடர்ந்து செல்லுபடியாகும் என்று மத்திய அரசு தெரிவித்துள்ளது. எனினும், தங்கத்தின் தூய்மையில் ஏதேனும் குறைபாடு இருப்பது தெரியவந்தால் அதற்கு இழப்பீடு செலுத்த வேண்டும்.

ஆக, பொதுமக்கள் தங்களிடம் இருக்கும் ஹால்மார்க் இல்லாத பழைய தங்க நகைகளை தாராளமாக விற்பனை செய்யலாம், அடமானம் வைக்கலாம், நகைக் கடன் வாங்குவதற்கும் பயன்படுத்தலாம்.