நல்ல விஷயத்துக்காக டாடாவுடன் கூட்டணி.. 1200 கோடிக்கு பச்சை கொடி காட்டிய ஐசிஐசிஐ வங்கி!

டாடா மெமோரியல் செண்டரின் புற்றுநோய் சிகிச்சை மருத்துவமனையை விரிவாக்கம் செய்வதற்கு 1200 கோடி ரூபாய் வழங்கப்படும் என ஐசிஐசிஐ வங்கி தெரிவித்துள்ளது.

டாடா அறக்கட்டளையை சேர்ந்த டாடா மெமோரியல் செண்டர் புற்றுநோய் மருத்துவமனைகளை நடத்தி வருகிறது. இந்த மருத்துவமனைகளில் இலவசமாக சிகிச்சை வழங்கப்பட்டு வருகிறது. இந்நிலையில், டாடா மெமோரியல் செண்டர் தனது புற்றுநோய் மருத்துவமனைகளை விரிவாக்கம் செய்வதற்காக ஐசிஐசிஐ வங்கி நிதி வழங்க முடிவு செய்துள்ளது.

ஐசிஐசிஐ வங்கி சார்பில் ஐசிஐசிஐ ஃபவுண்டேஷன் இயங்கி வருகிறது. இதன் வாயிலாக ஐசிஐசிஐ வங்கி தனது சமூக பணிகளை மேற்கொண்டு வருகிறது. இந்நிலையில், டாடா மெமோரியல் செண்டர் தனது புற்றுநோய் மருத்துவமனையை விரிவாக்கம் செய்ய 1200 கோடி ரூபாய் வழங்கப்படும் என ஐசிஐசிஐ வங்கி இன்று தெரிவித்துள்ளது.

இந்த விரிவாக்க திட்டத்தின் கீழ் மும்பை அருகே உள்ள கர்கார், பஞ்சாபில் உள்ள முல்லன்பூர், ஆந்திர பிரதேசத்தில் விசாகப்பட்டிணம் ஆகிய மூன்று இடங்களில் டாடா புற்றுநோய் மருத்துவமனைகள் அமைக்கப்படும். 2027ஆம் ஆண்டுக்குள் இந்த மூன்று மருத்துவமனைகளும் கட்டமைக்கப்பட்டு இயங்க தொடங்கிவிடும் என ஐசிஐசிஐ வங்கியின் தலைவர் கிரிஷ் சந்திர சதுர்வேதி தெரிவித்துள்ளார்.

இந்த மூன்று மருத்துவமனைகளும் ஆண்டுக்கு 25,000 நோயாளிகளுக்கு புற்றுநோய் சிகிச்சை வழங்கும் திறன் கொண்டவை. இந்த மருத்துவமனை விரிவாக்க திட்டத்துக்கு 1200 கோடி ரூபாய் வழங்குவதற்கு ஐசிஐசிஐ வங்கி இன்று மூன்று புரிந்துணர்வு ஒப்பந்தங்களில் கையெழுத்திட்டுள்ளது.

தற்போது இந்த மருத்துவமனை விரிவாக்க திட்டத்துக்காக 500 கோடி ரூபாய் சிஎஸ்ஆர் நிதி தயாராக இருப்பதாகவும், வரும் ஆண்டுகளில் அடுத்தகட்ட நிதி வழங்கப்படும் எனவும் ஐசிஐசிஐ வங்கி தெரிவித்துள்ளது.