பொறுமையா இருந்தா 13 மடங்கு லாபம்.. தாறுமாறாக வருமானம் கொடுத்த பங்கு.. இப்போ வாங்கலாமா?

Cera Sanitaryware share: செரா சானிட்டரிவேர் பங்கு கடந்த சுமார் பத்து ஆண்டுகளில் 13 மடங்கு லாபத்தை அள்ளி கொடுத்துள்ளது. இந்த பங்குக்கு ஐசிஐசிஐ செக்யூரிட்டிஸ் பாசிட்டிவ் ரேட்டிங் கொடுத்துள்ள நிலையில் இன்றும் பங்கு விலை உயர்ந்துள்ளது.

பங்கு சந்தையில் உடனுக்கு உடனே பணக்காரராக வேண்டும் என ஆசைப்படுவோர் பணத்தை இழந்துவிடுகின்றனர். ஆனால், நல்ல தரமான பங்குகளில் முதலீடு செய்துவிட்டு பொறுமையாக காத்திருப்போர் பல மடங்கு பணம் சம்பாதிக்கின்றனர்.

அவ்வகையில், செரா சானிட்டரிவேர் (Cera Sanitaryware) பங்கு கடந்த 10 ஆண்டுகளில் 13 மடங்குக்கு மேல் லாபம் கொடுத்துள்ளது. அதாவது 1300% மேல் லாபத்தை வாரி வழங்கியுள்ளது செரா சானிட்டரிவேர் பங்கு. இதனால் பங்குதாரர்கள் அட்டகாசமான வருமானம் ஈட்டியுள்ளனர்.

ஐசிஐசிஐ செக்யூரிட்டிஸ் (ICICI Securities) நிறுவனம் செரா சானிட்டரிவேர் பங்குக்கு பாசிட்டிவான ரேட்டிங் கொடுத்துள்ளது. பலமான நிதி நிலை, விரிவான விநியோக அமைப்பு, பெயர் பெற்ற பிராண்ட், பல ரகங்களிலான தயாரிப்புகள் போன்றவை செரா சானிட்டரிவேர் நிறுவனத்தின் சாதகமான அம்சங்கள் என ஐசிஐசிஐ செக்யூரிட்டிஸ் கருதுகிறது.

வீடுகள் மற்றும் ரியல் எஸ்டேட் சந்தையில், குறிப்பாக இரண்டாம் அடுக்கு நகரங்கள் மற்றும் சிறு நகரங்களில் ரியல் எஸ்டேட் சந்தை முன்னேற்றத்தால் செரா சானிட்டரிவேர் நிறுவனத்தின் தயாரிப்புகளுக்கு டிமாண்ட் நிலையாக இருக்கிறது எனவும் ஐசிஐசிஐ செக்யூரிட்டிஸ் நம்புகிறது.

இதுமட்டுமல்லாமல், மூலப் பொருட்களின் விலை உயராததால் உற்பத்தி செலவுகளும் அதிகரிக்கவில்லை. இதனால், வருமானத்துக்கு எந்த பாதிப்பும் இருக்காது என எதிர்பார்க்கப்படுகிறது.

இவை அனைத்தையும் கருத்தில் கொண்டு செரா சானிட்டரிவேர் பங்குக்கு ஐசிஐசிஐ செக்யூரிட்டிஸ் நிறுவனம் 'Add’ ரேட்டிங் கொடுத்துள்ளது. மேலும் செரா சானிட்டரிவேர் பங்குக்கு ஐசிஐசிஐ செக்யூரிட்டிஸ் 6,746 ரூபாய் டார்கெட் விலை வைத்துள்ளது.

இந்நிலையில், இன்று பங்கு வர்த்தக முடிவில் செரா சானிட்டரிவேர் பங்கு விலை 3.68% உயர்ந்து 6445 ரூபாயாக உள்ளது. இன்று மட்டுமே செரா சானிட்டரிவேர் பங்கு விலை 229 ரூபாய் உயர்ந்துள்ளது.