பொருளாதார வளர்ச்சியில் பின்னடைவு.. ஆய்வில் தகவல்!

கொரோனா பிரச்சினை வந்த பிறகு இந்தியப் பொருளாதார வளர்ச்சியில் தேக்கம் ஏற்பட்டு, சரிவுப் பாதையில் இந்தியா பயணிக்கத் தொடங்கியது. இந்தியப் பொருளாதார வளர்ச்சி குறித்த தங்களது மதிப்பீடுகளையும் ஆய்வு நிறுவனங்கள் குறைத்துக்கொண்டன. எனினும், கொரோனா தடுப்பூசித் திட்டம் போன்ற அரசின் நடவடிக்கைகளால் பொருளாதார வளர்ச்சி மீண்டும் வளர்ச்சிப் பாதையில் பயணிக்கத் தொடங்கியது.

எனினும், 2021ஆம் ஆண்டின் அக்டோபர் - டிசம்பர் காலாண்டில் வளர்ச்சியில் சற்று பாதிப்பு ஏற்பட்டது. கொரோனா மூன்றாம் அலை காரணமாக இந்த சரிவு ஏற்பட்டதாகவும், அந்த காலாண்டில் இந்தியப் பொருளாதார வளர்ச்சி 3.5 சதவீதமாக மட்டுமே இருக்கும் எனவும் இக்ரா நிறுவனம் தெரிவித்துள்ளது. முன்னதாக ஜூலை - செப்டம்பர் காலாண்டில் இந்தியா 5.4 சதவீத வளர்ச்சியைக் கொண்டிருந்தது.

இக்ரா நிறுவனம் தனது மதிப்பீட்டைக் குறைத்திருந்தாலும், வேறு சில ஆய்வு நிறுவனங்கள் இந்தியப் பொருளாதார வளர்ச்சி குறித்து நம்பிக்கை தெரிவித்து வருகின்றன. ஆனால் அரசு தரப்பில் பொருளாதார ஆய்வறிக்கை இன்னும் வெளியாகவில்லை. மே 31ஆம் தேதியில் அந்த அறிக்கையை மத்திய புள்ளியியல் அலுவலகம் வெளியிடும். அதன் மீது அதிக எதிர்பார்ப்பு உள்ளது.

நடப்பு 2022-23 நிதியாண்டில் இந்தியா 8.9 சதவீத வளர்ச்சியை எட்டும் என்று நிதியமைச்சர் நிர்மலா சீதாராமன் நம்பிக்கை தெரிவித்துள்ளார். அதேபோல, உலக வங்கி, சர்வதேச நாணய நிதியம் போன்ற அமைப்புகளும் இந்திய வளர்ச்சி குறித்து நம்பிக்கை தெரிவித்துள்ளன.