பெர்சனல் லோன் வாங்கப் போறீங்களா? இதெல்லாம் முக்கியம்!

நாடு முழுவதும் கொரோனா பாதிப்பால் பொதுமக்களுக்குக் கடுமையான நிதி நெருக்கடி நிலவுகிறது. அவசரத் தேவைகளுக்குக் கூட பணம் இல்லாமல் பலர் தவிக்கின்றனர். இதுபோன்ற சூழலில் பலர் வங்கியில் லோன் வாங்கலாமா என்று யோசிப்பதுண்டு. திருமணம், வீட்டைப் புதுப்பிப்பது போன்ற செலவுகளுக்கும் சிலர் கடன் வாங்க நினைப்பார்கள். அவர்களுக்கு பெர்சனல் லோன் மிகவும் உதவியாக இருக்கும். இது ஒரு பாதுகாப்பற்ற கடனாகும். நீங்கள் பெர்சனல் லோன் வாங்க விரும்பினால் இந்த விஷயங்களையெல்லாம் பார்த்துவிட்டு வாங்கலாம்.

பெர்சனல் லோன் வாங்குவதற்கு சம்பள ரசீது, வருமான வரித் தாக்கல் படிவம் உள்ளிட்ட ஆவணங்கள் தேவைப்படும். நீங்கள் வாங்கும் மாத சம்பளம், வங்கியில் உங்களது கிரெடிட் ஸ்கோர் போன்றவற்றையெல்லாம் வைத்துத்தான் உங்களுக்கு எவ்வளவு கடன் வழங்கலாம் என்று வங்கிகள் முடிவெடுக்கும். நீங்கள் கேட்கும் தொகை கடனாகக் கிடைத்துவிடாது. வங்கிகள் அதற்கு சில வரையறைகள் வைத்துள்ளன. நீங்கள் வாங்கும் கடனை உங்களால் சரியான காலத்தில் திருப்பிச் செலுத்த முடியுமா என்பதை வங்கிகள் முடிவெடுத்து அதன் பின்னர் கடன் வழங்கப்படும்.

நகைக் கடன் வட்டித் தள்ளுபடி... ஹேப்பி நியூஸ்!!
பொதுவாக கடனுக்கு விண்ணப்பித்தவுடன் பணம் வந்து சேர 2 முதல் 7 நாட்கள் வரை ஆகும். உடனடிக் கடனும் கிடைக்கும். அது வங்கி மற்றும் வாங்குபவரின் தகுதியைப் பொறுத்து இருக்கும். உங்களது வருமானத்தைப் பொறுத்து வங்கிகள் ரூ.50 லட்சம் வரையில் கடன் வழங்குகின்றன. கடன் வரம்பு காலம் முடிவதற்கு முன்னரே கடனைத் திருப்பிச் செலுத்த நீங்கள் விரும்பினாலும் செலுத்திவிடலாம். வட்டி விகிதத்தைப் பொறுத்தவரையில் தற்போது பல்வேறு வங்கிகளில் 10 முதல் 24 சதவீதம் வரை வட்டி பிடிக்கப்படுகிறது.

நீங்கள் கடன் வாங்க விரும்பினால் ஏதேனும் ஒரு வங்கியைத் தேர்ந்தெடுத்து வாங்கினால் நல்லது. ஒரே நேரத்தில் நிறைய வங்கிகளில் கடனுக்கு விண்ணப்பித்தால் உங்களது கடன் மதிப்பீடு குறைய வாய்ப்பு உள்ளது.