LIC பாலிசிதாரர்கள் கவனத்துக்கு... பான் கார்டு லிங்க் பண்ணியாச்சா?

பான் கார்டு என்பது வருமான வரித் துறையால் வழங்கப்படும் 10 இலக்க ஆல்பாநியூமெரிக் நம்பரைக் கொண்ட ஒரு அட்டையாகும். இது தனிமனிதனின் அடையாள ஆவணமாக மட்டுமல்லாமல், வருமான வரி, பணப் பரிவர்த்தனை போன்ற விஷயங்களில் அதிகாரப்பூர்வமான ஒரு ஆவணமாகவும் உள்ளது. இந்த பான் கார்டை அனைவரும் தங்களது ஆதார் கார்டுடன் இணைக்க வேண்டும் என்று மத்திய அரசு உத்தரவிட்டுள்ளது. இதற்கு செப்டம்பர் 30 வரை கால அவகாசமும் வழங்கப்பட்டது. பின்னர் இந்த அவகாசம் 2022 மார்ச் 31ஆம் தேதி வரை நீட்டிக்கப்பட்டது.

இன்னும் அதற்கு நிறைய அவகாசம் இருப்பதால் பான் கார்டை ஆதாருடன் இணைக்காமல் இருப்பவர்கள் இணைத்துவிடலாம். ஆதார் மட்டுமல்லாமல், LIC பாலிசிகளுடனும் பான் கார்டை இணைக்க வேண்டும் என்று தனது சந்தாதார்களை LIC நிறுவனம் வலியுறுத்தியிருந்தது. இது தொடர்பான சந்தேகங்களுக்கு licindia.in என்ற வெப்சைட்டில் சென்று வாடிக்கையாளர்கள் விளக்கம் பெறலாம். மேலும், பான் இணைப்பு தொடர்பாக தனது ட்விட்டர் பக்கத்திலும் LIC நிறுவனம் தகவல் வெளியிட்டுள்ளது.

எல்ஐசி பாலிசியுடன் பான் கார்டை இணைப்பது சுலபமான ஒன்றுதான். ஆன்லைன் மூலமாகவே இணைக்கலாம்.

licindia.in. என்ற வெப்சைட்டில் லாகின் செய்து 'Online PAN Registration' என்ற வசதியில் செல்ல வேண்டும்.

இணைக்க வேண்டிய பாலிசிகள் மற்றும் பான் கார்டு விவரங்களைத் தயாராக வைத்துக்கொள்ள வேண்டும்.

'Proceed' கொடுத்த பின்னர் இ-மெயில் ஐடி, பான் நம்பர், மொபைல் நம்பர், பாலிசி நம்பர் போன்றவற்றையும், கேப்ட்சா குறியீட்டையும் பதிவிட வேண்டும்.

’Get OTP' கொடுத்தவுடன் மொபைல் நம்பருக்கு ஓடிபி அனுப்பப்படும். அதைப் பதிவிட்டு ‘submit' கொடுக்க வேண்டும்.

இப்போது பான் கார்டும் எல்ஐசி பாலிசிகளும் இணைக்கப்பட்டுவிடும். இதற்கான உறுதிப்படுத்துதல் தகவல் மொபைல் நம்பருக்கு எஸ்எம்எஸ் மூலமாக அனுப்பப்படும்.