Direct Tax collection: நேரடி வரி வசூல் ரூ.15.67 லட்சம் கோடி.. 24% உயர்வு!

நடப்பு நிதியாண்டில் பிப்ரவரி 10ஆம் தேதி வரையிலான நேரடி வரி வசூல் குறித்த விவரங்களை நிதியமைச்சகம் வெளியிட்டுள்ளது. அதன்படி, நடப்பு நிதியாண்டில் பிப்ரவரி 10ஆம் தேதி வரை மொத்த நேரடி வரி வசூல் 15.67 லட்சம் கோடி ரூபாயாக உள்ளது.

கடந்த நிதி ஆண்டை காட்டிலும் நடப்பு நிதியாண்டில் மொத்த நேரடி வரி வசூல் 24.09% உயர்ந்துள்ளது என நிதியமைச்சகம் தெரிவித்துள்ளது. நடப்பு நிதியாண்டு மார்ச் 31ஆம் தேதியுடன் முடிவடையும் நிலையில், இப்போது வெளியாகியுள்ள வரி வசூல் விவரங்கள் பிப்ரவரி 10ஆம் தேதி வரையிலான தற்காலிக விவரங்கள் மட்டுமே.

தற்காலிக விவரங்களின்படி நேரடி வரி வசூல் நிலையான வளர்ச்சி பெற்றுள்ளதாக நிதியமைச்சகம் தெரிவித்துள்ளது. ரீஃபண்ட் தொகை போக நிகர நேரடி வரி வசூல் 12.98 லட்சம் கோடி ரூபாயாக இருப்பதாகவும் நிதியமைச்சகம் வெளியிட்டுள்ள தகவலில் தெரிவித்துள்ளது. கடந்த நிதியாண்டை காட்டிலும் நிகர நேரடி வரி வசூல் 18.40% வளர்ச்சி பெற்றுள்ளது.

நடப்பு 2022-23ஆம் நிதியாண்டுக்கான நேரடி வரி வசூல் பட்ஜெட் மதிப்பீட்டில் 91.39% வசூலாகிவிட்டதாகவும், திருத்தப்பட்ட மதிப்பீட்டில் 78.65% வசூலாகிவிட்டதாகவும் நிதியமைச்சகம் தெரிவித்துள்ளது.

நேரடி வரியில் கார்ப்பரேட் வரி வசூல் 19.33% வளர்ச்சியும், தனிநபர் வருமான வரி வசூல் 29.63% வளர்ச்சியும் பெற்றுள்ளது. ரீஃபண்ட் செலுத்திய பின் நிகர கார்ப்பரேட் வரி வசூல் வளர்ச்சி 15.84% ஆகவும், தனிநபர் வருமான வரி வசூல் வளர்ச்சி 21.93% ஆகவும் இருக்கிறது.

ஏப்ரல் 1ஆம் தேதி முதல் பிப்ரவரி 10ஆம் தேதி வரை 2.69 லட்சம் கோடி ரூபாய் ரீஃபண்ட் தொகை செலுத்தப்பட்டுள்ளது. கடந்த நிதி ஆண்டில் செலுத்தப்பட்ட ரீஃபண்ட் தொகையை விட இந்த நிதியாண்டில் ரீஃபண்ட் 61.58% உயர்ந்துள்ளது.