வருமான வரி: 24 லட்சம் பேருக்கு ரீபண்ட்!

கொரோனா பாதிப்பு நிலவும் சூழலில் அனைத்துத் தரப்பிலும் நிதி நெருக்கடி ஏற்பட்டுள்ளது. மக்களின் வாழ்வாதாரத்தைக் காக்க அரசு தரப்பிலிருந்து பொருளாதாரச் சலுகைகள் அறிவிக்கப்பட்டன. அதோடு, பிஎஃப் பணத்தை முன்கூட்டியே எடுப்பது, வருமான வரி ரீஃபண்ட் தொகையை விரைந்து வழங்குவது போன்ற நடவடிக்கைகளும் மேற்கொள்ளப்பட்டன. இதன்படி, இந்த நிதியாண்டின் இதுவரையிலான காலத்தில் வருமான வரி செலுத்திய 24.64 லட்சம் பேருக்கு ரூ.88,652 கோடி ரீஃபண்ட் தொகையை மத்திய நேரடி வரிகள் வாரியம் வழங்கியுள்ளது.

வருமான வரிக்கான ரீஃபண்ட் தொகையாக 23,05,726 வழக்குகளின் கீழ் ரூ.28,180 கோடியும், கார்பரேட் வரிக்கான ரீஃபண்ட் தொகையாக 1,58,280 வழக்குகளின் கீழ் ரூ.60,472 கோடியும் வழங்கப்பட்டுள்ளது. ஏப்ரல் 1 முதல் இது வரையிலான காலத்தில் இத்தொகையை மத்திய நேரடி வரிகள் வாரியம் வழங்கியுள்ளது. கொரோனா பாதிப்பு நிலவும் இச்சூழலில் வரி தொடர்பான விஷயங்களில் மக்களுக்கு ஏதுவான நடவடிக்கைகளில் ஈடுபட்டு வருவதாக அரசு தரப்பில் தெரிவிக்கப்பட்டுள்ளது.

நேர்மையாக வரி செலுத்துவோரைக் கௌரவிக்கும் பிரதமர் மோடி!

முன்னதாக, ஜூலை 11 வரையிலான காலத்தில் மொத்தம் 21 லட்சம் பேருக்கு ரீஃபண்ட் தொகையை மத்திய நேரடி வரிகள் வாரியம் விடுவித்திருந்தது. ஏப்ரல் 8 முதல் ஜூலை 11 வரையிலான காலகட்டத்தில் மட்டும் மொத்தம் ரூ.71,229 கோடி ரீஃபண்ட் வழங்கப்பட்டது. இதில் தனிநபர் வருமான வரிக்கான ரீஃபண்ட் தொகையாக ரூ.24,603 கோடியை 19.97 லட்சம் பேருக்கு வழங்கியது. அதேபோல, கார்பரேட் வரிக்கான ரீஃபண்ட் தொகையாக ரூ.46,626 கோடித் தொகையை 1.45 லட்சம் பேருக்கு ரீஃபண்ட் செய்தது.

இந்த சேமிப்புக் கணக்கில் செம வருமானம்... சூப்பரா சம்பாதிக்கலாம்!

கொரோனா பாதிப்பு நிலவுவதால் வரி செலுத்துவோரின் நலனைக் கருத்தில் கொண்டு இந்த ஆண்டின் ஆகஸ்ட் 31ஆம் தேதிக்குள் ரீஃபண்ட் தொகை முழுவதும் வழங்கப்பட்டுவிடும் என்று மத்திய நேரடி வரிகள் வாரியம் தெரிவித்துள்ளது. பிரதமர் நரேந்திர மோடியால் சுயசார்பு இந்தியா திட்டம் அறிவிக்கப்பட்ட பிறகு வருமான வரி செலுத்துபவர்களுக்கு திருப்பி அளிக்கப்பட வேண்டிய ரீஃபண்ட் தொகை விரைவாக திருப்பி அளிக்கப்பட்டு வருகிறது என்பது குறிப்பிடத்தக்கது.