இந்தியப் பொருளாதார வளர்ச்சி: நம்பினால் நம்புங்கள்!

வேலையில்லாத் திண்டாட்டம், பொருளாதார மந்தநிலை ஆகிய இரு பெரும் பிரச்சினைகள் கடந்த சில ஆண்டுகளாகவே மத்திய மோடி அரசுக்குத் தலைவலியாக உள்ளன. பொருளாதார வளர்ச்சியை மேம்படுத்துவதற்கான முனைப்பில் மத்திய அரசு ஈடுபட்டிருந்த நிலையில், எரியும் நெருப்பில் எண்ணெய் ஊற்றியது போல கொரோனா வைரஸ் பாதிப்பு இந்தியாவில் விஸ்வரூபம் எடுத்தது. இந்தியாவில் கொரோனா வைரஸ் பரவலைக் கட்டுப்படுத்த மார்ச் மாத இறுதியில் ஊரடங்கு அமல்படுத்தப்பட்டதால் தொழில் நடவடிக்கைகள் அனைத்தும் முடங்கின. ஏற்றுமதி - இறக்குமதி வர்த்தகத்தில் முட்டுக்கட்டை விழுந்தது. இதுபோன்ற காரணங்களால் இந்தியப் பொருளாதாரம் மாபெரும் வீழ்ச்சியை எதிர்நோக்கியது.

இதன் விளைவாக, ஏப்ரல் - ஜூன் காலாண்டில் இந்தியப் பொருளாதாரம் மிக மோசமாக 23.9 சதவீத வீழ்ச்சியைச் சந்தித்தது. அதைத் தொடர்ந்த ஜூலை - செப்டம்பர் காலாண்டில் இந்தியப் பொருளாதாரம் 7.5 சதவீதம் வீழ்ச்சியைச் சந்தித்தது. நடப்பு காலாண்டிலும் வீழ்ச்சி அதிகமாகவே இருக்கும் என்று பல்வேறு ஆய்வு நிறுவனங்கள் எச்சரித்துள்ளன. இந்நிலையில், 2021-22 நிதியாண்டில் இந்தியப் பொருளாதாரம் 10 சதவீத வளர்ச்சியை அடையும் என்று டெலாய்ட் நிறுவனம் தனது ஆய்வில் தெரிவித்துள்ளது. கொரோனா பாதிப்புகளையும் தாண்டி இந்தியா இந்த வளர்ச்சி நிலையை அடையும் என்று இந்த ஆண்டில் நம்பிக்கை தெரிவிக்கப்பட்டுள்ளது.

ரியல் எஸ்டேட் துறை எப்போது மீளும்?

வாய்ஸ் ஆஃப் ஆசியா என்ற தலைப்பில் டெலாய்ட் நிறுவனம் வெளியிட்டுள்ள இந்த ஆய்வறிக்கையில், இந்தியாவில் உற்பத்தித் துறை வளர்ச்சி கண்டுள்ளதாகவும், இதனால் இந்தியாவின் ஒட்டுமொத்த வளர்ச்சியில் ஏற்றம் காணப்படும் எனவும் கூறப்பட்டுள்ளது. கார் விற்பனை அதிகரிப்பு, எஃகு உற்பத்தி உயர்வு, டீசல் நுகர்வு அதிகரிப்பு, ஜிஎஸ்டி வருவாய் உயர்வு போன்ற காரணங்களால் இந்த வளர்ச்சி சாத்தியம்தான் எனவும் கூறப்பட்டுள்ளது. ஊரடங்கில் தளர்வுகள் அறிவிக்கப்பட்டது, பண்டிகைக்கால சலுகைகள் போன்றவையும் நாட்டின் வளர்ச்சிக்கு ஆதாரங்களாகத் திகழும் என்று டெலாய்ட் நிறுவனம் தனது ஆய்வில் தெரிவித்துள்ளது.