பொருளாதார வளர்ச்சியில் நம்பிக்கை! SBI சொன்ன நல்ல செய்தி!

2020ஆம் ஆண்டின் தொடக்கத்தில் இந்தியாவில் கொரோனா பாதிப்பு அதிகமாக இருந்ததால் நாடு தழுவிய ஊரடங்கு அமல்படுத்தப்பட்டது. இதனால் உற்பத்தி, ஏற்றுமதி - இறக்குமதி உள்ளிட்ட பொருளாதார நடவடிக்கைகள் முடங்கின. இந்தியப் பொருளாதாரமும் மிகப் பெரிய வீழ்ச்சியைச் சந்தித்தது. கொரோனாவுக்கு மருந்து கண்டுபிடிக்கப்பட்டு இயல்பு நிலை திரும்பி வருவதால் இந்தியப் பொருளாதாரமும் வளர்ச்சிப் பாதைக்குப் பயணிக்கத் தொடங்கியது. 2020-21 நிதியாண்டின் அக்டோபர் - டிசம்பர் காலாண்டில் இந்தியப் பொருளாதாரம் 0.4 சதவீதம் வளர்ச்சி கண்டு நம்பிக்கையை ஏற்படுத்தியது.

ஆனால், கொரோனா இரண்டாம் அலை வீசத் தொடங்கியதால் மீண்டும் பொருளாதார வளர்ச்சியில் முட்டுக்கட்டை விழுந்தது. மீண்டும் பல்வேறு மாநிலங்களில் ஊரடங்கு அமல்படுத்தப்பட்டுள்ளன. இந்நிலையில், சென்ற ஜனவரி - மார்ச் காலாண்டில் இந்தியப் பொருளாதாரம் 1.3 சதவீதம் வளர்ச்சியைச் சந்திக்கும் என்று எஸ்பிஐ ரிசர்ச் ஆய்வறிக்கை கூறியுள்ளது. எனினும், 2020-21 முழு நிதியாண்டில் இந்தியப் பொருளாதாரம் 7.3 சதவீதம் வீழ்ச்சியைச் சந்திக்கும் என்று இந்த ஆய்வில் எச்சரிக்கப்பட்டுள்ளது.

சமையல் சிலிண்டர் டெலிவரி கிடைக்காதா? மீண்டும் ஒரு புதிய பிரச்சினை!
2020-21 நிதியாண்டில் இந்தியப் பொருளாதார வளர்ச்சி குறித்த மதிப்பீட்டை வருகிற மே 31ஆம் தேதி தேசிய புள்ளியியல் அலுவலகம் வெளியிடவுள்ளது. அதற்கு முன்பாகவே எஸ்பிஐ ரிசர்ச் தனது ஆய்வறிக்கையை வெளியிட்டு நம்பிக்கையை ஏற்படுத்தியுள்ளது. ஜனவரி - மார்ச் காலாண்டில் வளர்ச்சி திரும்பியுள்ளதாக எஸ்பிஐ ரிசர்ச் கூறியுள்ளது. சர்வதேச அளவில் இதுவரையில் பொருளாதார வளர்ச்சி குறித்த அறிக்கைகளை வெளியிட்டுள்ள 25 நாடுகளில் இந்தியா ஐந்தாவது மிக வேகமாக வளரும் நாடாக இருப்பதாகவும் இந்த ஆய்வில் தெரிவிக்கப்பட்டுள்ளது.