பொருளாதார வளர்ச்சி கண்டிப்பாக இருக்கும்... அரசு நம்பிக்கை!

2020ஆம் ஆண்டின் தொடக்கத்தில் இந்தியாவில் கொரோனா பாதிப்பு அதிகமாக இருந்ததால் நாடு தழுவிய ஊரடங்கு அமல்படுத்தப்பட்டது. இதனால் உற்பத்தி, ஏற்றுமதி - இறக்குமதி உள்ளிட்ட பொருளாதார நடவடிக்கைகள் முடங்கின. இந்தியப் பொருளாதாரமும் மிகப் பெரிய வீழ்ச்சியைச் சந்தித்தது. கொரோனாவுக்கு மருந்து கண்டுபிடிக்கப்பட்டு இயல்பு நிலை திரும்பி வருவதால் இந்தியப் பொருளாதாரமும் வளர்ச்சிப் பாதைக்குப் பயணிக்கத் தொடங்கியது. 2020-21 நிதியாண்டின் அக்டோபர் - டிசம்பர் காலாண்டில் இந்தியப் பொருளாதாரம் 0.4 சதவீதம் வளர்ச்சி கண்டு நம்பிக்கையை ஏற்படுத்தியது.

ஆனால், கொரோனா இரண்டாம் அலை தற்போது வீசிக் கொண்டிருப்பதால் மீண்டும் பொருளாதார வளர்ச்சியில் முட்டுக்கட்டை விழுந்துள்ளது. மீண்டும் பல்வேறு மாநிலங்களில் ஊரடங்கு அமல்படுத்தப்பட்டுள்ளது. இந்நிலையில் இந்தியப் பொருளாதார வளர்ச்சி குறித்து இந்திய அரசின் தலைமைப் பொருளாதார ஆலோசகரான கிருஷ்ணமூர்த்தி சுப்ரமணியன் நம்பிக்கை தெரிவித்துள்ளார். நடப்பு நிதியாண்டில் 11 சதவீத வளர்ச்சியை இந்தியா அடையும் என்று கூறியுள்ளார். மேலும், கொரோனா இரண்டாம் அலையால் மிகப் பெரிய பாதிப்பு ஏற்படவில்லை எனவும் அவர் கூறியுள்ளார்.

பெட்ரோலுக்கு வரி... கல்லா கட்டும் வசூல்!
இந்த ஆண்டின் ஜனவரி மாதத்தில் 2020-21 பொருளாதார ஆய்வறிக்கை வெளியிடப்பட்டது. அதில் 11 சதவீத வளர்ச்சி இருக்கும் என்று மதிப்பிடப்பட்டிருந்தது. அதன் பின்னர் கொரோனா இரண்டாம் அலை வீசத் தொடங்கியதால் இந்த வளர்ச்சியை அடைய முடியுமா என்ற சந்தேகம் இருந்தது. ஆனால் மதிப்பிடப்பட்டபடி 11 சதவீத வளர்ச்சியை இந்தியா கட்டாயம் அடையும் என்று கிருஷ்ணமூர்த்தி சுப்ரமணியன் தெரிவித்துள்ளார்.