இந்திய பொருளாதாரம்: அமெரிக்க வங்கி நம்பிக்கை!

சென்ற ஆண்டின் தொடக்கத்தில் இந்தியாவில் கொரோனா பாதிப்பு தீவிரமாக இருந்த நிலையில் நாடு முழுவதும் ஊரடங்கு அமல்படுத்தப்பட்டது. இதனால் உள்நாட்டு உற்பத்தி, ஏற்றுமதி - இறக்குமதி உள்ளிட்ட பொருளாதார நடவடிக்கைகள் முடங்கின. இதன் விளைவாக இந்தியப் பொருளாதாரமும் மிகப் பெரிய வீழ்ச்சியைச் சந்தித்தது. கொரோனாவுக்கு மருந்து கண்டுபிடிக்கப்பட்டு இயல்பு நிலை திரும்பியநிலையில் இந்தியப் பொருளாதாரமும் வளர்ச்சிப் பாதைக்குப் பயணிக்கத் தொடங்கியது.

2020-21 நிதியாண்டின் அக்டோபர் - டிசம்பர் காலாண்டில் இந்தியப் பொருளாதாரம் 0.4 சதவீதம் வளர்ச்சி கண்டு நம்பிக்கையை ஏற்படுத்தியது. ஆனால், கொரோனா இரண்டாம் அலை வீசத் தொடங்கியதால் மீண்டும் பொருளாதார வளர்ச்சியில் முட்டுக்கட்டை விழுந்தது. எனினும், கொரோனா தடுப்பூசித் திட்டத்தால் பொருளாதார வளர்ச்சியில் பெரிய அளவில் பாதிப்பு ஏற்படவில்லை. ஒவ்வொரு காலாண்டிலும் வளர்ச்சி அதிகரித்தது. சர்வதேச ஆய்வு நிறுவனங்களும் இந்திய வளர்ச்சி குறித்து நேர்மறையான மதிப்பீடுகளையே வெளியிட்டன.

பொருளாதார வளர்ச்சி: நல்ல காலம் பொறக்குது!
இந்நிலையில், அடுத்த நிதியாண்டில் இந்தியப் பொருளாதாரம் 8.2 சதவீத வளர்ச்சியை எட்டும் என்று பேங்க் ஆஃப் அமெரிக்கா ஆய்வில் தெரிவிக்கப்பட்டுள்ளது. எனினும், கடந்த இரண்டு நிதியாண்டுகளைப் போல இல்லாமல், 2022ஆம் ஆண்டில் பணவீக்கம், நாணயக் கொள்கை போன்றவற்றில் சில நெருக்கடிகள் இருக்கும் எனவும், அதை எதிர்த்துப் போராடி முன்னேறிச் செல்ல வேண்டும் என்று இந்த ஆய்வில் எச்சரிக்கப்பட்டுள்ளது. இந்தியப் பொருளாதார வளர்ச்சியில் வேளாண் துறையின் பங்களிப்பு அதிகமாக இருக்கும் எனவும் இந்த ஆய்வில் சுட்டிக் காட்டப்பட்டுள்ளது.