பட்ஜெட் 2023: முக்கிய பிரச்சினையில் கை வைக்கும் மத்திய அரசு!

2023-24ஆம் நிதியாண்டுக்கான பட்ஜெட் தயார் செய்யும் பணியில் மத்திய அரசு தீவிரமாக ஈடுபட்டுள்ளது. வரும் பிப்ரவரி 1ஆம் தேதி நாடாளுமன்றத்தில் மத்திய பட்ஜெட் அறிக்கையை நிதியமைச்சர் நிர்மலா சீதாராமன் தாக்கல் செய்வார் என எதிர்பார்க்கப்படுகிறது.

இந்தாண்டு பட்ஜெட்டில் பொதுமக்களுக்கும், தொழில்துறைக்கும் பல்வேறு எதிர்பார்ப்புகள் இருக்கின்றன. பணவீக்கம், வட்டி உயர்வு, ஆட்குறைப்பு, பொருளாதார மந்தநிலை அச்சம் போன்ற நெருக்கடிகளுக்கு மத்தியில் வரும் பட்ஜெட் என்பதால் எதிர்பார்ப்புகள் சற்று அதிகமாகவே இருக்கின்றன.

இந்நிலையில், வரும் மத்திய பட்ஜெட்டில் உணவு மற்றும் உரம் மானியங்களை குறைப்பதற்கு அரசு திட்டமிட்டுள்ளதாக தகவல் வெளியாகியுள்ளது. அதாவது தற்போதைய அளவை விட உணவு மற்றும் உரம் மானியத்தை 26% குறைக்க அரசு திட்டமிட்டுள்ளதாக தகவல் வெளியாகியுள்ளது.

Rice price: தாறுமாறாக உயரும் அரிசி விலை.. காரணம் என்ன?
இந்தியாவின் மொத்த பட்ஜெட்டில் உணவு மற்றும் உரம் மானியங்களுக்கு மட்டும் எட்டில் ஒரு பகுதி பங்கு உள்ளது. இந்நிலையில், வரும் நிதியாண்டில் உணவு மற்றும் உரம் மானியத்தை குறைக்க அரசு திட்டமிட்டுள்ளதாக தகவல் வெளியாகியுள்ளது.

நடப்பு நிதியாண்டில் உணவு மற்றும் உரம் மானியம் 2.7 லட்சம் கோடி ரூபாயாக உள்ளது. வரும் நிதியாண்டில் உணவு மற்றும் உரம் மானியத்தை 2.3 லட்சம் கோடி ரூபாயாக குறைக்க அரசு திட்டமிட்டுள்ளதாக அதிகாரிகள் வட்டாரத்தில் தகவல் வெளியாகியுள்ளது.

உணவு மற்றும் உரம் மானியத்தை குறைப்பதால், எளிய மக்களுக்கு வழங்கப்படும் இலவச ரேஷன் பொருட்கள் குறைந்துவிடும். பல்வேறு மாநில சட்டமன்ற தேர்தல்கள் 2024ஆம் ஆண்டில் நாடாளுமன்ற பொதுத் தேர்தல் என தேர்தல்கள் வரிசைகட்டி நிற்கும் நிலையில், உணவு மற்றும் உரம் மானியம் குறைக்கப்படுவது அரசியல் ரீதியாகவும் முக்கிய விவகாரமாக இருக்கும் என அரசியல் விமர்சகர்கள் கூறுகின்றனர்.