வட்டியைக் குறைத்த இந்தியன் ஓவர்சீஸ் வங்கி!

பொதுத் துறை வங்கியான இந்தியன் ஓவர்சீஸ் பேங்க் (IOB) தனது எம்சிஎல்ஆர் (marginal cost based lending rate) கட்டணத்தைக் குறைப்பதாக இன்று அறிவித்துள்ளது. இதன்படி, அனைத்து கால வரம்புகளுக்கான கடன்களின் வட்டி விகிதமும் 10 அடிப்படைப் புள்ளிகள் குறைக்கப்படுகிறது. இதனால் இந்தியன் ஓவர்சீஸ் வங்கியில் வீட்டுக் கடன், வாகனக் கடன் உள்ளிட்ட கடன் வாங்கியவர்களுக்கு ஈஎம்ஐ தொகை குறையும் என்பதால் வாடிக்கையாளர்கள் மகிழ்ச்சியடைந்துள்ளனர்.

இதுகுறித்து இந்தியன் ஓவர்சீஸ் வங்கி வெளியிட்டுள்ள அறிக்கையில், ஓவர்நைட் எம்சிஎல்ஆர் கட்டணம் 7.30 சதவீதத்திலிருந்து 7.20 சதவீதமாகக் குறைக்கப்படுவதாக அறிவிக்கப்பட்டுள்ளது. இதுதவிர, ஒரு வருட கால வரம்புக்கான கடன்களுக்கு வட்டி விகிதம் 7.75 சதவீதத்திலிருந்து 7.65 சதவீதமாகக் குறைக்கப்பட்டுள்ளது. இந்த வட்டிக் குறைப்பானது ஆகஸ்ட் 10ஆம் தேதி முதல் அமலுக்கு வரும் என்று அறிவிக்கப்பட்டுள்ளது.

கடனாளிகளுக்கு ஆறுதல் தருமா ரிசர்வ் வங்கியின் அறிவிப்பு?

ரிசர்வ் வங்கியின் நாணயக் கொள்கைக் கூட்டத்தில் ரெப்போ விகிதக் குறைப்பு மீதான எதிர்பார்ப்பில் வங்கிகள் தங்களது வட்டி விகிதங்களைக் குறைத்தன. இருப்பினும் பணவீக்கப் பிரச்சினையைக் கருத்தில் கொண்டு இந்த முறை ரெப்போ வட்டி விகிதத்தை ரிசர்வ் வங்கி குறைக்கவில்லை. 4 சதவீதமாகவே நீடிக்கும் என்று அறிவித்தது. இந்த ஆண்டில் மட்டும் ரெப்போ வட்டி விகிதத்தை 115 புள்ளிகள் குறைத்துள்ளது. ரெப்போ வட்டி விகிதம் இந்த முறை குறைக்கப்படாவிட்டாலும் வங்கிகள் தங்களது கடன்களுக்கான வட்டி விகிதங்களைக் குறைத்து வருகின்றன.

வட்டியில் எந்த மாற்றமும் இல்லை: ரிசர்வ் வங்கி அறிவிப்பு!

நேற்று இந்தியாவின் மிகப் பெரிய தனியார் துறை வங்கியான ஹெச்டிஎஃப்சி தனது வட்டி விகிதத்தைக் குறைத்திருந்தது. எம்சிஎல்ஆர் விகிதத்தை 10 அடிப்படைப் புள்ளிகள் குறைப்பதாக அறிவித்தது. அதற்கு முன்னர், மற்றொரு தனியார் துறை வங்கியான ஐசிஐசிஐ வங்கியும் ஆகஸ்ட் 1 முதல் அதன் கடன் விகிதங்களை 10 அடிப்படை புள்ளிகள் குறைப்பதாக அறிவித்தது. பொதுத் துறை வங்கியான கனரா வங்கியும் அதன் எம்சிஎல்ஆர் கட்டணத்தை 30 அடிப்படைப் புள்ளிகள் வரை குறைப்பதாக அறிவித்தது. மற்ற வங்கிகளும் விரைவில் வட்டிக் குறைப்பை அறிவிக்கும் என்று எதிர்பார்க்கப்படுகிறது.